ગૌણ સેવા પસંદગી મંડળનું પેપર લીક થવા મામલે રાજ્યમાં અત્યારે વિરોધ ચાલી રહ્યો છે. જેનાં સંદર્ભે પેપર લીકેજ કૌભાંડ પ્રકરણના વિરોધમાં ભરૂચ ખાતે આમ આદમી પાર્ટીના ધરણા પ્રદર્શન અને આમ આદમી પાર્ટીના કાર્યકરોએ સૂત્રોચારો સાથે વિરોધ પ્રદર્શન કર્યું હતું. જેમાં આમ આદમી પાર્ટીના પ્રમુખ જયેન્દ્ર્સિંહ રાજ સહીતના આગેવાનો કાર્યકરોએ પેપર લીક પ્રકરણનો વિરોધ કરી સૂત્રોચ્ચાર કર્યા હતા.

આપના જણાવ્યા અનુસાર ફાર્મ હાઉસમાં સાબરકાંઠાના ૧૬ ઉમેદવારોની પાસેથી વ્યક્તિ દીઠ ૧૨ લાખ રૂપિયા લઇ રાત્રે નવ વાગ્યે પેપર હાથમાં આપ્યાં હતાં. તે સાથે કેટલાંક સોલ્યુશનના પુસ્તકો આપી તેમાંથી જવાબ પણ શોધી લેવાયાં હતાં. પરંતુ ૨૦૦ માંથી અમુક પ્રશ્નોના જવાબ ન મળતાં કેટલાંક ભરતી પરીક્ષાના ટ્રેઇનરોને બોલાવીને તેમના થકી બાકીના પ્રશ્નો સોલ્વ કરાયાં હતાં.પેપર લીક કાંડ બાદ ગંભીર આક્ષેપોનો સામનો કરી રહેલા ગૌણ સેવા પસંદગી મંડળના ચેરમેન અસિત વોરાના રાજીનામાની પણ આમ આદમી પાર્ટીએ માંગ કરી હતી.

ભરૂચ ખાતે આવેદન આપ્યા બાદ કલેકટરાલય બહાર આમ આદમી પાર્ટીએ આ મામલે સરકાર વિરુદ્ધ સુત્રોચ્ચાર કરીને અસિત વોરાને હટાવવાની માંગ કરી હતી. બાદમાં એ ડિવિઝન પોલીસે તમામને અટકાયતમાં લીધા હતા.

•કોરોના ના કારણે મંદિરમાં કર્યા હતા લગ્ન

પ્રેમના પર્વ વેલેન્ટાઈન ડેના દિવસે મંદિરમાં લગ્ન કરી બે દિવસ પછી તરત જ યુવકે આ જીવન પત્ની તરીકે સ્વીકારવા નું વચન આપી દુષ્કર્મ આચર્યું અને હવે યુવક યુવતીને આજીવન પત્ની તરીકે રાખવા તૈયાર ન હોવાના આક્ષેપ સાથે ભરૂચ સી ડિવિઝન પોલીસ મથકમાં યુવક સામે બળાત્કારનો ગુનો નોંધાયો છે.

જેમાં યુવકે યુવતી સાથે મંદિરમાં લગ્ન કરી એક વર્ષ સુધી તેણી સાથે દુષ્કર્મ આચર્યા બાદ તેણીને પત્ની તરીકે રાખવા તૈયાર ન હોવાના કારણે તેમજ અન્ય યુવતી સાથે લગ્ન કરવાની ઈચ્છા ધરાવનાર યુવક સામે બળાત્કારનો ગુનો દાખલ થયો છે.

ભરૂચ સી ડિવિઝન પોલીસ મથકમાં નોંધાયેલી ફરીયાદ અનુસાર પીડિતાએ ફરિયાદમાં આક્ષેપ કર્યા હતા કે ભરૂચના મેડિકલમાં નોકરી કરતા અલ્પેશકુમાર શૈલેષભાઈ પટેલ કે જેવો આલી નવા ફળીયા બીએસએનએલ ઓફિસની પાછળ એમજી રોડ ભરૂચનાઓ સાથે પ્રેમ સંબંધ થયા હતા અને અલ્પેશકુમાર પટેલે મને આજીવન પત્ની તરીકે સ્વીકારવાનું વચન આપી કોરોનાના કારણે બંન્નેવે ગત તારીખ ૧૪/૨/૨૦૨૦ના રોજ આમોદ તાલુકાના બળીયાદેવ મંદિરે બન્નેવની મરજી અને રાજીખુશીથી હિન્દુ રિવાજ મુજબ હિન્દુ શાસ્ત્રો વિધિ મુજબ મહારાજે કાયદેસરના લગ્ન કરાવ્યા હતા.

જે લગ્ન બાદ બંનેવ આજીવન પતિ- પત્ની તરીકેના વચને બંધાયા હતા. તારીખ ૧૭/૨/૨૦૨૦ ના રોજ પતિ અલ્પેશકુમાર પટેલ તેઓના ઘરે પટાવી ફોસલાવી મારી ઇચ્છા વિરુદ્ધ બળજબરીથી સૌ પ્રથમ શરીર સંબંધ બાંધ્યા હતા અને મને કહેલ કે હવે આપણાં લગ્ન થઇ ગયેલ છે અને હું તને જ આ જીવન પત્ની તરીકે રાખવાનો છું. તું મારી ઉપર વિશ્વાસ અને ભરોસો રાખ.

ત્યારબાદ અલ્પેશ પટેલે તેના જન્મદિવસના બીજા દિવસ એટલે ૨૭/૬/૨૦૨૦ ના રોજ આલી વિસ્તારમાં તેના ઘરે શરીર સંબંધ બાંધ્યા હતા અને ત્યાર પછી અલ્પેશે જાન્યુઆરી ૨૦૨૧માં ચાવજ ગામે આવેલ માંગલ્ય રેસીડેન્સીમાં પોતાનું મકાન લીધું હતું અને તેઓએ ત્યાં રહેવા ગયા હતા અને ત્યાં ઘરે પણ લઈ જઈ અલગ અલગ રીતે આશરે ચારથી પાંચ વખત શરીરસુખ માણ્યું હતું અને ત્યારબાદ પીડિતાને કહ્યું હતું કે કોરોનાની મહામારી પતી જાય પછી હું તને ધામ ધુમથી લગ્ન કરી મારા ઘરે લઈ જઈશ.

કોરોના મહામારીના કારણે અમારા લગ્ન ડિસેમ્બર ૨૦૨૧માં લગ્ન કરવાનું નક્કી કરેલ હતું. પરંતુ આ દરમિયાન અલ્પેશે ઓગસ્ટ ૨૦૨૧થી મારી સાથે ધામધૂમથી મને લગ્ન કરી તેડી જવાની આનાકાની કરી ખોટા ઝઘડા કરવા લાગેલ અને મને સામાજિક રીતે ધામધૂમથી લગ્ન કરી તેડી જવાની સ્પષ્ટ ના પાડી દીધેલી જેથી મારો પતિ અન્ય યુવતી સાથે લગ્ન કરવાનો હોવાના કારણે પીડિતાને પત્ની તરીકે સ્વીકારવા તૈયાર ન હોવાના ઇરાદો દેખાયો હતો. આ ફરિયાદમાં પીડિતાએ તેણીનું મંગળસૂત્ર તથા સોનાની બુટ્ટી તથા તેના મકાનનો માસિક હપ્તો રૂપિયા ૮૦૦૦ પણ પીડિતાએ તેના પગારમાંથી આપ્યા હોવાના ગંભીર આક્ષેપ કર્યા છે.

આખરે પીડિતાએ ભરૂચ સી ડિવિઝન પોલીસ મથકે પતિ અલ્પેશકુમાર શૈલેષભાઈ પટેલ સામે બળાત્કારનો ગુનો દાખલ કરાવ્યો હતો. ભરૂચ સી-ડિવિઝન પોલીસે પત્નીનો અસ્વીકાર કરનાર પતિ સામે ગુનો નોંધી આગળની તપાસ હાથધરી છે.

•ખેતરમાં ધાસચારો લેવા ગયેલ સગીરને ઢિકાપાટુનો માર મરાયો
•૧૫ જેટલા લોકોએ કુહાડી તથા લાકડી વડે કર્યો હૂમલો

ભરૂચના ચાવજ ગામે ખેતરમાં ઘાસચારો લેવા ગયેલા સગીરને ગાડી હટાવવા મુદ્દે બોલાચાલી થતાં આ ધટનાએ મારામારીનું મોટું સ્વરૂપ ધારણ કર્યું હતું.જેમાં ૧૫ જેટલા લોકોએ કુહાડી અને લાકડી વડે હિંસક હૂમલો કરતા એક સગીર સહિત કુલ ૩ ને ઇજાઓ પહોંચી હતી. જેમને સારવાર અર્થે ભરૂચ સિવિલ હોસ્પીટલમાં લવાયા હતા.

ભરૂચના ચાવજ ગામે ખોડીયાર નગરમાં રહેતો અર્જુન પેઠા ભરવાડ ઉ. ૧૭ આજે ખેતરે ઘાસચારો લેવા ગયો હતો. દરમિયાન વહનનો એકજ ચીલો હોય અને વાહન વચ્ચે હોય બોલાચાલી કરી ઘેલા ઘુધા ભરવાડે સગીરને તમાચા અને ઢીકાપાટુનો માર માર્યો હતો. જેથી અર્જુન પોતાના ઘરે દોડી ગયો હતો. જ્યાં તેના મોટાબાપા સહિતનાઓને આ વાતની જાણ થતાં બંન્નેવ પક્ષે બોલાચાલી ઉગ્ર બની હતી અને આ બોલાચાલીએ હિંસક રૂપ લેતાં ઘેલા ઘુધા ભરવાડ સહિત ૧૫ જેટલા લોકોએ ચુંટનીની જુની રીષ તથા ખેતરની બોલાચાલીના પગલે કુહાડી અને લાક્ડીઓ વડે ખોડીયાર નજીકમાં જ મારામારી કરતા ગભા પોપટ ભરવાડ ઉ.55 રહે.ચાવજ ખોડિયાર નગર,મુન્નાભાઈ પોપટ ભરવાડ ઉ.50 રહે.ચાવજ તથા અર્જુન પેઠા ભરવાડ ઉ. ૧૭ને સારવાર અર્થે ભરૂચ સિવિલ હોસ્પીટલ ખસેડાયા હતા.

બનાવ અંગે સી ડિવિઝન પોલીસ મથકે અરજી આપતા પોલીસે ઘાયલોના જવાબો લઈ ફરીયાદ નોંધવા કવાયત હાથધરી છે.

આમોદ તાલુકામાં આવેલાં કાંકરિયા ગામે ચૂંટણી ટાણે ધર્માંતરણનો મામલો પુન: ગરમાયો હતો. ધર્માંતરણને લઈને ફરિયાદ કરનારા શખસના ઘરે બે ઈસમોએ લાકડી-છરા સાથે પહોંચી તેમને જાનની મારી નાંખવાની ધમકીઓ આપી હતી. જેના પગલે આમોદ પોલીસે ગુનો નોંધી આગળની કાર્યવાહી હાથ ધરી છે.

આમોદના કાંકરિયા ગામે 150 હિંદુઓનું ધર્માતરણ કરવામાં આવ્યું હતું. જે મામલે કોઠી ફળિયામાં રહેતાં પ્રવિણ વસંત વસાવાએ ધર્માંતરણના મુદ્દે પોલીસ ફરિયાદ નોંધાવી હતી. આ દરમિયાન ગઇકાલે મંગળવારે સાંજે તેઓ પોતાના ઘરે હતાં તે વેળાં ગામના જ પ્રવિણ પ્રહલાદ ઠાકોર તેમજ કમલેશ કાલીદાસ વસાવાએ લાકડી તેમજ છરા લઇને તેના ઘરે પહોંચ્યા હતા. જ્યા તેઓએ જોર-જોરથી બુમો પાડી હતી અને તેને તથા તેના પરિવારને આજે પતાવી દેવાના છે તેવી જાનથી મારી નાંખવાની ધમકીઓ આપી હતી. આ દરમિયાનમાં આસપાસના લોકોનું 25થી 30 જણાનું ટોળું એકત્ર થઈ ગયું હતું.

ત્યારે હૂમલાખોરોએ કહ્યુ કે, આમના લીધે આપણે બધા હેરાન થઈએ છીએ જેથી આજે આને પતાવી દેવાના છે. તેમ કહી ટોળાને પણ ઉશ્કેર્યુ હતું. જોકે, તેના ઘરે ફરજ પર હાજર જીઆરડી જવાનોએ તેમને રોકવાનો પ્રયત્ન કર્યો હતો. આ ઉપરાંત પોલીસને જાણ કરતાં પોલીસ કાફલો આવી પહોંચ્યો હતો. જોકે, ધમકી આપવા આવેલા શખસો નાસી છુટ્યાં હતાં. આ બનાવ સંદર્ભે આમોદ પોલીસે ગુનો નોંધી આગળની કાર્યવાહી હાથ ધરી છે.

ભરૂચ આમ આદમી પાર્ટી દ્વારા ભાજપના ઇશારે હેદ કલાર્ક પરિક્ષા પેપર લીક મુદ્દે આવેદન આપવા ગયેલા કાર્યકર્તાઓ ઉપર હૂમલો અને તેમની ધરપકદ કરી કરાતી હેરાંગતી ના વિરોધમાં ધરણા પ્રદર્શન સાથે રામધૂન યોજી વિરોધ કરાયો હતો.

ભરૂચ સ્ટેચ્યુ પાર્ક ખાતે યોજાયેલા આ પ્રતિક ધરણાં અને રામધૂન દ્વારા કરાયેલા વિરોધ પ્રદર્શનમાં આમ આદમી પાર્ટીના ભરૂચ જિલ્લા પ્રમુખ જયેન્દ્રસિંહ રાજે જણાવ્યું કે, હેડ ક્લાર્કના પેપર લીક થવા મુદ્દે ગુજરાત આમ આદમી પાર્ટીનું શિર્ષ નેતૃત્વ, સી.વાય. એસ.એસ.અને વિદ્યાર્થી સંધના યુવાનો વિરોધમાં આવેદન આપવા કમલમ ખાતે પહોંચ્યા હતાં. જ્યાં આવેદનપત્ર આપવાની કોશિષ દરમિયાન સરકારના ઇશારે પોલીસ દ્વારા અત્યાચાર ગુજારી લાઠીચાર્જ કરાવી ભાજપ કાર્યકરો દ્વારા આમ આદમીના કાર્યકરો પર હૂમલો કરાયો છતાં આ મામલે ૮૦ જેટલા લોકોની અટકાયત કરી તેમના ઉપર ૧૮ જેટલી વિવિધ કલમો લગાડી આમ આદમીપાર્ટીને હેરાન કરવાનું જે કૃત્ય આચરાયું છે તેને ભરૂચ આમ આદમી પાર્ટી દ્વારા વખોડી રામધૂન સાથે પ્રતિક ધરણાં પ્રદર્શન કરી વિરોધ નોંધાવે છે..

• ૪૦ પરિક્રમાવાસીઓ ભરેલી ઓલપાડના ડભારી દરિયા કિનારે બોટ આવતા તમામનું સુરક્ષિત રેસ્ક્યુ કરતા પરિક્રમાવાસીઓમાં જીવમાં જીવ આવ્યો.

શાસ્ત્રોમાં પણ જેનો ઉલ્લેખ છે તે માં નર્મદાની પરિક્રમાનું ધાર્મિક મહત્વ વધુ હોવાથી ગુજરાત, ઉતરપ્રદેશ, મહારાષ્ટ્ર, મધ્યપ્રદેશથી પરિક્રમાવાસીઓ મોટી સંખ્યામાં પરિક્રમા માટે આવતા હોય છે.જેઓ હાસોટના દરિયા કિનારે આવેલા ગામથી બોટમાં બેસી ભરૂચના અંભેટા ગામ નજીક નર્મદા સંગમ સુધી પહોંચી નર્મદા પરિક્રમાની શરૂઆત કરતા હોય છે.

ત્યારે હાંસોટના કિનારેથી ૪૦ જેટલા પરિક્રમાવાસીઓ ભરી બોટ દહેજ નજીક આવેલ અંભેટા ગામ જવા નીકળી હતી. પરંતુ બોટ ચાલક દરિયામાં રસ્તો ભૂલી દિશા ભટકી જતા બોટમાં સવાર ૪૦ પરિક્રમાવાસીઓના જીવ તાળવે ચોટી ગયા હતા. જોકે દરિયામાં પરિક્રમાવાસીઓ ભરેલી બોટ દરિયામાં રૂટ ભૂલી હોવાના સમાચાર મળતા અંકલેશ્વર SDM અને હાંસોટ મામલતદાર એલર્ટ થયા હતા.

સદનસીબે દરિયામાં ભૂલી પડેલી બોટ ઓલપાડના દરિયા કિનારે આવેલા ડભારી ગામે નીકળતા ગામના સરપંચ અને ઓલપાડ પોલીસ તાબડતોડ દરિયા કિનારે પહોંચી હતી અને તમામ પરિક્રમાવાસીઓનું રેસ્ક્યુ કરી સુરક્ષિત હાંસોટ ખાતે પરત મોકલવામાં આવ્યા હતા.

ઉલ્લેખનીય છે કે જયારે દરિયામાં ભૂલી પડેલી બોટ ઓલપાડના ડભારી દરિયા કિનારે આવી હતી. ત્યારે ૪૦ જેટલા પરિક્રમાવાસીઓનું સુરક્ષિત રેસ્ક્યુ કરાતા પરિક્રમાવાસીઓમાં જીવમાં જીવ આવ્યો હતો. ઘટનાને પગલે હાંસોટ મામલતદાર ફાન્સિસ વસાવા પણ ઘટના સ્થળે દોડી આવ્યા હતા. ઓલપાડ પોલીસ અને સ્થાનિક સરપંચ દ્વારા તમામ લોકોને સુરક્ષિત હાંસોટ ખસેડવામાં આવ્યા હતા.