રાજયમાં રવિવારે યોજાયેલી ગ્રામ પંચાયતની ચુંટણીની મત ગણતરી મંગળવારના રોજ હાથ ધરવામાં આવી હતી. પરિણામો જાહેર થતાંની સાથે કહી ખુશી કહી ગમનો માહોલ જોવા મળ્યો હતો.

રાજયની 8 હજાર કરતાં વધારે ગ્રામ પંચાયતોમાં રવિવારના રોજ સરપંચ તેમજ વોર્ડ સભ્યો માટે ચુંટણી યોજવામાં આવી હતી. આજે મંગળવારે સવારે 9 વાગ્યાથી મત ગણતરી શરૂ કરી દેવામાં આવી છે. અત્યાર સુધીમાં અનેક ગ્રામ પંચાયતોના પરિણામો આવી ચુકયાં છે. ગ્રામ પંચાયતની ચુંટણીમાં બેલેટ પેપરથી મતદાન થયું હોવાથી પરિણામો આવવામાં સમય લાગી રહયો છે. ગ્રામ પંચાયતની ચુંટણી બેલેટ પેપરથી યોજવામાં આવી હતી.

ભરૂચ જિલ્લાની વાત કરવામાં આવે તો ભરૂચ તાલુકામાં 12 ગ્રામપંચાયતો સમરસ થતાં 66 ગ્રામપંચાયતોની મતગણતરી કે.જે.પોલીટેકનીક કોલેજ ખાતે અને અંકલેશ્વરમાં 34 ગ્રામપંચાયતોની મત ગણતરી જીનવાલા હાઇસ્કુલ ખાતે હાથ ધરાય હતી. મત ગણતરીના સ્થળોએ સવારથી જ ચુસ્ત પોલીસ બંદોબસ્ત ખડકી દેવામાં આવ્યો હતો.

તો બીજી તરફ સવારથી જ ઉમેદવારો અને તેમના સમર્થકોનો પણ જમાવડો થઇ ગયો હતો. મતદારોની સંખ્યા પ્રમાણે ગ્રામ પંચાયતોને ક્રમમાં ગોઠવી મત ગણતરી હાથ ધરાઇ હતી. વિજેતા બનેલાં ઉમેદવારોને સમર્થકોએ ઢોલ નગારાના નાદ સાથે વધાવી લીધાં હતાં. ભરૂચ અને અંકલેશ્વરમાં મોટી ગણાતી ગ્રામ પંચાયતોમાં ભારે રસાકસી જામી હતી.

ઉલ્લેખનીય છે કે મોડી સાંજ સુધી કુલ ગ્રામ પંચાયતોમાંથી 50 ટકા જેટલી જ ગ્રામ પંચાયતોના પરિણામો જાહેર થયા હતા. જ્યારે અન્ય ગ્રામ પંચાયતોની મત ગણતરી મોડી રાત સુધી ચાલુ રહી હતી.

ભરૂચ તાલુકાના હિંગલોટ ગામે જીતેલા ઉમેદવારોએ ગામમાં વિજય સરઘસ કાઢતા હારી ગયેલા ઉમેદવારોના પરિવારોએ પથ્થરમારો કરવા સાથે લાકડીઓ વડે હુમલો કર્યો હોવાની ઘટના સામે આવતા સામસામે થયેલ ધીંગાણામાં કુલ ૧૨ લોકોને ઇજાઓ થતાં ઇજાગ્રસ્તોને સારવાર માટે ભરૂચ સિવિલ હોસ્પિટલ ખાતે ખસેડવામાં આવ્યા છે.

ભરૂચ જિલ્લામાં 413 ગ્રામ પંચાયતની ચૂંટણી માટે રવિવારના રોજ મતદાન પ્રક્રિયા યોજાઇ હતી અને મંગળવારે સવારથી જ મત ગણતરી કરવામાં આવતા કેટલાય ઉમેદવારો જીતનો જશ્ન મનાવી રહ્યા છે. ત્યારે ભરૂચ તાલુકાના હીંગલોટ ગામે પણ વિજેતા સરપંચના ઉમેદવારએ ગામમાં વિજય સરઘસ કાઢ્યું હતું. ગામમાં વિવિધ વિસ્તારોમાંથી સરઘસ પસાર થઈ રહ્યું હતું તે દરમિયાન જ સામે પરાજિત થયેલા ઉમેદવારોના પરિવારજનોએ વિજય સરઘસ પર પથ્થરમારો કરી લાકડીના સપાટા સાથે રસ્તા ઉપર ઉતરી આવ્યા હતા.

આ ધિંગાણામાં ઐયુબ ઉમરજી માસ્તર, સીમા ઐયુબ માસ્તર, નઇમ ઐયુબ માસ્તર,જેબુન ઐયુબ માસ્તર, રઇશા ઐયુબ માસ્તર,મૈફૂઝા હબીબ બારમણીયા તમામ રહેવાસી હિંગલોટ અને સામાવાળા મુસ્તકીમ અહમદ જમાલ,મહેશ અખુભાઇ રાઠોડ,ટકુ બાલુ રાઠોડ,જશી હુરસંગ રાઠોડ, અમીના ઇબ્રાહીમ પટેલ,રઇશા ઇમરાન પટેલ મળી કુલ ૧૨ જેટલા ઇસમો ઘાયલ થયા હતા.આ સમગ્ર ધિંગાણામાં પથ્થરમારો, અપશબ્દોનો વરસાદ અને મારામારી કરી રહ્યા હોવાના દૃશ્યો મોબાઈલ વીડિયો વાઇરલ થયા હતા.જો કે આ સમગ્ર મામલે તાલુકા પી.આઇ. ફરીયાદ લેવા જતાં બંન્નેવ પક્ષે ફરીયાદ કરવાની ના પાડી હોવાની માહિતી સાંપડી રહી છે.

ભરૂચ જિલ્લા કોંગ્રેસ સમિતિ દ્વારા હેડ ક્લાર્કની પરીક્ષાનું પેપર લીક થવા મામલે વિરોધ કરી ધરણાં પ્રદર્શન યોજી ન્યાયની માંગણી કરવામાં આવી હતી. તેમજ જવાબદાર લોકો સામે યોગ્ય પગલાં ભરવાની પણ માંગ કરવામાં આવી હતી.

તાજેતરમાં યોજાયેલી હેડ ક્લાર્કની પરીક્ષાનું પેપર લીક થવાને પગલે પૈસા બગાડી પરીક્ષાઓની તૈયારીઓ કરી રહેલા હજારો ઉમેદવારોની મહેનત પર પાણી રેડાયું છે. આ પેપર લીક થવાના મુદ્દે વિદ્યાર્થીઓ ઠેરઠેર વિરોધ કરી રહ્યા છે. ત્યારે આજે સોમવારના રોજ ભરૂચ જિલ્લા કોંગ્રેસ સમિતિ દ્વારા કોંગ્રેસ કાર્યાલય ખાતે ધરણાં પ્રદર્શન યોજાયું હતું.

જિલ્લા કોંગ્રેસ સમિતિએ હેડ ક્લાર્કની પરીક્ષાનું પેપર લીક થવાના મામલે જવાબદાર વ્યક્તિઓ સામે પગલાં ભરવાની માંગ કરી હતી. નોંધનીય છે કે આ ધરણાં કાર્યક્રમમાં જિલ્લા કોંગ્રેસનાં પ્રમુખ પરિમલસિંહ રાણા અને કોંગ્રેસનાં આગેવાનો ઉપસ્થિત રહ્યા હતા.

ચિંતન સભામાં સરદારધામના પ્રણેતા ગગજીભાઈ સુતરીયા ધારાસભ્ય દુષ્યંતભાઈ પટેલ, દૂધ ડેરીના ચેરમેન ઘનશ્યામભાઈ પટેલ તથા ૧૨ જેટલા લેઉવા પટેલ સમાજના પ્રમુખ તથા આગેવાનો ઉપસ્થિત રહ્યા હતા.

ભરૂચ તથા નર્મદા જિલ્લાના લેઉવા પાટીદાર સમાજમાં કાર્યરત નાના મોટા સમાજોના આગેવાનો દ્વારા ભરૂચ અને નર્મદા જિલ્લા ના સમાજ ભેગા મળી શ્રી સરદાર પટેલ પાટીદાર સેવા સમાજ નામની સંસ્થા બનાવી છે. શ્રી સરદાર પટેલ પાટીદાર સેવા સમાજ દ્વારા આજરોજ ભરૂચ અને નર્મદા જિલ્લાના અલગ-અલગ નાના-મોટા પાટીદાર સમાજના પ્રમુખો અને આગેવાનો ચિંતન સભા ભરૂચ નર્મદા ચોકડી પટેલ ના મોટેલ ખાતે આયોજિત કરી હતી. આ ચિંતન સભામાં સરદાર ધામ વિશ્વ પાટીદાર સમાજ ના પ્રણેતા ગગજીભાઈ સુતરીયા, ભરૂચના ધારાસભ્ય દુષ્યંતભાઈ પટેલ, દૂધધારા ડેરીના ચેરમેન ઘનશ્યામભાઈ પટેલ, ભરૂચના નરેશભાઈ પટેલ તથા ત્રાલસા વિભાગ પાટીદાર સમાજ, ૨૫ ગામ લેવા પાટીદાર પંચ કલીયારી વિભાગ લેઉવા પાટીદાર સમાજ, આમોદ એકડા લેઉવા પાટીદાર સમાજ, વીસ ગામ જૂના રાજના પાટીદાર સમાજ રાજપીપળા, કાનમ પ્રદેશ પાટીદાર સેવા સમાજ ભરૂચ નર્મદા, છન્નુ ગામ કડવા પાટીદાર કેળવણી સંસ્થા ભરૂચ, બાવીસ ગામ લેવા પટેલ સમાજ કરજણ, બાર ગામ લેઉવા પટેલ સમાજ અંકલેશ્વર, લેઉવા પાટીદાર સમાજ જંબુસર, ચરોતર પાટીદાર સમાજ ભરૂચ તથા શ્રી પાટીદાર સમાજ ના પ્રમુખશ્રીઓ મંત્રી શ્રી ઓ તથા સમાજના અગ્રણીઓ તથા યુવાનો ઉપસ્થિત રહ્યા હતા. ચિંતન સભા માં સમાજના આગેવાનો દ્વારા સમાજમાં પ્રવર્તતી અનેક સમસ્યાઓ ના નિવારણ માટે હાલમાં કાર્યકારી સમિતિ તથા રેગ્યુલર સમિતિ બનાવવાની ટહેલ નાંખી હતી. જાગૃત સુરક્ષિત અને શિક્ષિત સમાજ ની રચના માટે આર્થિકતા અને સમાજની એકતા પર ભાર મૂકવામાં આવ્યો હતો. સમાજ નો ઉપયોગ રાજકારણમાં ના થાય પરંતુ સમાજ માટે રાજકારણ નો ઉપયોગ કરવાની ટકોર પણ ઉપસ્થિત સમાજના વડીલો દ્વારા કરવામાં આવી હતી. વડીલોએ માર્ગદર્શન આપતા જણાવ્યું હતું કે એક દોરો સહેલાઈથી તૂટી જશે પરંતુ એકથી વધુ દોરા ભેગા હશે તો દોરડું બની જશે તેમ જણાવ્યું હતું. ભરૂચ અને નર્મદા જિલ્લાની ભૂમિ સાથે સંકળાયેલા પાટીદાર કારણસર પૂર્વ અને પશ્ચિમ સાગર અને રાજ્યની એકમાત્ર બારમાસી નદી હોવા છતાં ક્ષાર યુકત પાણીના કારણે પરંપરાગત ખેતી નબળી થવાથી આ વિસ્તારમાં નાના મોટા ઉદ્યોગો તથા યોજનાઓ દ્વારા રાજ્ય અને દેશભરના લોકો વસ્યા જેથી ખેડૂત ફક્ત ખેતી પર નિર્ભર રહેતા નોકરી-ધંધા દ્વારા પૂરક આવક મેળવતા થયા હતા ભૂમિ અને પાણીની સમસ્યાના કારણે ઉદ્યોગો આવ્યા પણ ખેડૂતોની ભૂમિ સ્થળાંતર વધ્યું જેથી આ બંને જિલ્લામાં વસતા પાટીદારોની એક બે પેઢી થી સાંસ્કૃતિક ધોવારણ જોવામાં આવે છે તેવો સૂર ઉઠ્યો હતો. આ ઉપરાંત વિવિધ સમાજના અગ્રણીઓની હાજરીમાં પાટીદાર સમાજના શિક્ષણ રોજગાર ધંધા આર્થિક-સામાજિક કૃષિલક્ષી બાબતો પર વિસ્તૃતમાં ચિંતન કરવામાં આવ્યું હતું.

•એક મહિલા અને ડેપ્યુટી સરપંચના પતિ સહિત પાંચ લોકોને ઈજા

ભરૂચના વાલિયા તાલુકાના ડહેલી ગામમાં ગ્રામ પંચાયતની ચૂંટણીના મતદાન ટાણે જ બે કોમના લોકો આમનેસામને આવી જતા ધીંગાણું સર્જાયું હતું. જે અથડામણે હિંસક રૂપ લેતાં એક મહિલા અને ડેપ્યુટી સરપંચના પતિ સહિત પાંચ લોકોને ઈજાઓ પહોંચી હતી. તેમને તાત્કાલિક સારવાર અર્થે 108 એબ્યુલન્સની સેવાની મદદ વડે વાલિયાના સામુહિક આરોગ્ય કેન્દ્ર ખાતે ખસેડવામાં આવ્યા હતા.

ઉલ્લેખનીય છે કે પંચાયતોની ચૂંટણી અંતર્ગત આજે રવિવારે સવારથી જ મતદાન મથકો પર લોકોની ભીડ જોવા મળી રહી છે. જેમાં ભરૂચ જિલ્લાના વાલિયા તાલુકાના ડહેલી ગામમાં ચૂંટણીની આગલી રાત્રીના સમયે જ બે કોમના લોકો વચ્ચે માથાકૂટ થઈ હતી.જેમાં મહિલા અને ડેપ્યુટી સરપંચના પતિ સહિત પાંચ લોકોને ઇજાઓ પહોંચી હતી. આ બનાવ અંગેની જાણ વાલિયા પોલીસ મથકે કરાતાં પોલીસ કાફલો તાત્કાલિક સ્થળ પર દોડી આવ્યો હતો.