ગૃહ મંત્રાલય, ભારત સરકાર દ્વારા તા.૨૧/૧૨/ર૦ર૧ તથા તા.૨૭/૧૨/૨૦૨૧ થી કોરોનાના સંકમણને રોકવા અધ્યતન સુચનાઓ આપવામાં આવેલ છે. ગૃહ વિભાગના તા.૭/૧/ર૦રર ના હુકમથી નોવેલ કોરોના વાયરસના સંકમણને અટકાવવા જરૂરી નિયંત્રણો મુકવા આવશ્યક પગલાંઓ લેવા જણાવવામાં આવતાં અને ભરૂચ જીલ્લામાં કોરોના પોઝીટીવ કેસ પ્રકાશમાં આવેલ હોય, આ વાયરસનો વધુ ફેલાવતો અટકાવવા મારે તકેદારીના પગલારૂપે લોકોની અવરજવર પર પ્રતિબંધ ફરમાવવાની જરૂરીયાત જણાતા

અધિક જીલ્લા મેજીસ્ટ્રેટ જે.ડી.પટેલ ભરૂચ દ્વારા નેશનલ ડિઝાસ્ટર મેનેજમેન્ટ એકટની કલમ-ર૬(ર) મુજ્બ તેમજ ધી એપેડેમીક ડીસીઝ એકટ ૧૮૯૭ ક્લમ-ર અન્વયે મને મળેલ સત્તાની રૂએ નેશનલ ડિઝાસ્ટર મેનેજમેન્ટ એકટની કલમ-૩૦ તથા કલમ-૩૪ હેઠળ ભરૂચ-અંકલેશ્વરના વિવિધ વિસ્તારોને કૉવીડ-૧૯ Containment Area તરીકે જાહેર કરાયા છે.

જેમાં
•ભરૂચના ઝાડેશ્વર વિસ્તારમાં મંગલ દર્શન સોસાયટીના મકાન નં.૩૯નો વિસ્તાર,આર.કે. કાઉન્ટ્રીના w/1/1/22 થી w/1/1/24નો વિસ્તાર,રંગ ટાઉનશીપના મકાન નં. ૧૭૫થી ૧૮૦ સુધીનો વિસ્તાર

•ભોલાવના અવધુત-2માં મકાન નં. એ-૬૦ થી એ-૭૧ સુધીનો વિસ્તાર,સોમેશ્વર બંગ્લોઝમાં મકાન નં. બી-૪૫ થી મકાન નંબર. બી- ૫૩નો વિસ્તાર,પાવન પુરી સોસાયટીમાં મકાન નં એ-૫ થી એ-૧૪નો વિસ્તાર,આર.કે.હેબીટેટના બ્લોક બી ત્રીજા માળનો તમામ વિસ્તાર

•ભરૂચ શહેરના વોર્ડનં.૩માં બી-૧૨ ભારતી રો-હાઉસનો વિસ્તાર, ઘર નં. ૧૯ કલ્પતરૂ સોસાયટીનો વિસ્તાર

•ભરૂચના વોર્ડ નં. ૪માં ડી/૧/૮ ન્યાયાધીશ નિવાસ કલેકટર ઓફીસ સામેનો વિસ્તાર,ઘર નં. ૨૯૭૭ અયોધ્યા નગર સોસાયટીનો વિસ્તાર

•ભરૂચના વોર્ડ નં. ૫માં ૧૧ સત્યમ સોસાયટી, આંગન ફ્લેટ કસકનો વિસ્તાર, ઘર નં. એ-૮ પ્રીતમ-૨ સોસાયટીનો વિસ્તાર, ઘર નં. એ-૧૯ પુષ્પમ બંગ્લોઝનો વિસ્તાર,ઘર નં-૬ મહાદેવ નગર સોસાયટી,જેપી કોલેજ સામેનો વિસ્તાર,ઘર નં. ૩૮ વૈકુંઠ સોસાયટીનો વિસ્તાર

•ભરૂચના વોર્ડ નં. ૭માં ઘર નં. ૫૬૪ ધોળીકુઇનો વિસ્તાર

•અંકલેશ્વર જી.આઇ.ડી.સી માં શાંતિવિલા રેસીડન્સી મકાન નં.૫ થી ૭, સીટી સેન્ટર, કેન્ડલ લકઝીરીયા રેસીડન્સી મકાન નં.બી-૪૦૧ થી બી-૪૦૪ , પ્લોટ નં.૮૪, જી.આઇ.ડી.સી.યુ.પી.એલ.કોલોની પાસે, રીધ્ધી રેસીડન્સી મકાન નં.૩૦૨ થી ૩૦૩, માતૃકૃપા બંગલોઝ, પ્લોટ નં.૩૦/૮/૩, સાંઇનાથ સોસાયટી, મકાન નં. એકસ-૫૮ થી એકસ -૬૦ સુધી.

•અંકલેશ્વર શહેરના ર્વોર્ડ નં. ૧ની ધનલક્ષ્મી સોસાયટી મકાન નં.સી-૫૭ થી સી-૬૨ સુધી.

•વોર્ડ નં.૨,ગજાનંદ સોસાયટી મકાન નં.૨૪ થી ૨૭

•વોર્ડ નં.૩ની આદર્શ સોસાયટી મકાન નં.૩૧ થી ૩૩ સુધી

•અંકલેશ્વરના કોસમડીની અંબેગ્રીન સોસાયટી, એ-૨૯ થી એ-૩૮, મુસા ઇબ્રાહીમ પટેલ થી જાવુદ્દીન ઇસ્માઇલ પટેલના ઘર સુધી

•અંકલેશ્વરના જીતાલીમાં ગાર્ડનસીટીના ડી/૩/૬૦ થી ડી/૩/૬૪ સુધી અને ડી/૩/૭૭ થી ડી/૩/૮૨ સુધીનો વિસ્તાર

•અંકલેશ્વરના ભડકોદ્રાના પટેલ પાર્કમાં મકાન. નં. એ-૧ થી એ-૧૦ સુધીના વિસ્તારોને કૉવીડ-૧૯ Containment Area તરીકે જાહેર કરાયા છે.

સમગ્ર રાજયમાં ફન્ટલાઇન વર્કર, હેલ્થ વર્કર તથા ૬૦ વર્ષથી વધુની વય ધરાવતા અને અન્ય ક્રોનિક બિમારીની સારવાર ચાલુ હોય તેવા નાગરિકોને કોરોના વેકિસનનો પ્રિક્રોશન ડોઝ આપવાનો રાજયવ્યાપી આજથી શુભારંભ કરાયો છે.

ભરૂચ જિલ્લામાં ૨૫૦૦૦ પ્રિકોશન ડોઝના લાભાર્થીઓ, ૧૫-૧૮ વર્ષની ઉંમરના ૧૨૦૧૫ લાભાર્થીઓ, તથા ૧૮ થી વધુ ઉંમરના બીજા ડોઝના બાકી લાભાર્થીને ૨૨૦૨૫નું રસીકરણ જે નિયત થયેલ ૨૨૫ વેકસીન સેન્ટર પરથી આપવાનું આયોજન કરવામાં આવેલ છે.

કોરોના વાયરસથી સુરક્ષિત રહેવા કોવિડ-૧૯ વેકસીનની રસી જ એક માત્ર અમોઘ શસ્ત્ર છે આજે જિલ્લામાં ૨૨૫ વેકસીન સેન્ટર પરથી તા.૧૦/૦૧/૨૦૨૨ને બપોરે ૦૪:૩૦ વાગ્યા સુધીમાં ફન્ટલાઇન વર્કર-૧૩૯૪, હેલ્થ વર્કર-૧૪૪૯ તથા ૬૦ વર્ષથી વધુની વય ધરાવતા અને અન્ય ક્રોનિક બિમારી ધરાવતા વ્યસકો-૧૩૪૧ મળી કુલ ૪૧૮૪ લોકોએ કોરોના વેકસીન પિક્રોશન ડોઝનો લાભ લીધો હતો.

આમોદ શહેર કોંગ્રેસ પ્રમુખે તેમજ કાર્યકર્તાઓએ આજ રોજ આમોદ મામલતદાર ડૉ.જે.ડી.પટેલને આવેદનપત્ર આપી કોરોના મૃતકના પરિવારજનોને સરકાર દ્વારા ચાર લાખની સહાય ચૂકવે તેવી માંગણી કરી હતી.આવેદનપત્રમાં જણાવ્યા મુજબ કોરોના મહામારીમાં ગુજરાત સરકારના બેદરકારી અને અણઘડ વહીવટને કારણે હોસ્પિટલમાં બેડ,દવાઓ,ઇન્જેક્શન, ઓક્સિજન અને વેન્ટિલેટરના અભાવે ગુજરાતમાં ત્રણ લાખથી વધુ લોકોના મૃત્યુ થયા હતાં.ખાનગી હોસ્પિટલમાં મોંઘી સારવારના નામે લાખો રૂપિયાની ઉઘાડી લૂંટ ચલાવવામાં આવી હતી.સરકાર દ્વારા મોતના આંકડા છુપાવી મૃતકોની યાદી ગેઝેટ મારફતે પ્રસિદ્ધ કરતી નથી.ત્યારે આમોદ શહેર કોંગ્રેસ દ્વારા કોવિડ-૧૯ થી અવસાન પામેલા દરેક મૃતકના પરિવાર માટે ચાર લાખના વળતરની માંગણી કરવામાં આવી હતી.તેમજ ભાજપ સરકાર દ્વારા પશુ તેમજ માનવી માટે ૫૦,૦૦૦ વળતરના એકસમાન ધારાધોરણ જાહેર કરી અસંવેદનશીલ હોવાનું પુરવાર કરી માનવજાતની પણ ક્રુર મજાક કરી હોવાનો કોંગ્રેસે આક્ષેપ કર્યો હતો.આમોદ મામલતદાર ડૉ.જે.ડી.પટેલને આવેદનપત્ર આપવા માટે શહેર કોંગ્રેસ પ્રમુખ અબ્દુલ મજીદ પટેલઉર્ફે બાબુભાઇ બરફવાલા,સાજીદ રાણા,સલીમ રાણા,હીરાભાઈ સોલંકી,ત્રિભોવન સોલંકી,અરવિંદ સોલંકી સહિતના કાર્યકરો હાજર રહ્યા હતાં.

વાયબ્રન્ટ સમિટ થકી ગુજરાત દેશનું ગ્રોથ એન્જીન બન્યું છે, વડાપ્રધાનએ શરૂ કરેલા વાયબ્રન્ટ ગુજરાતની પહેલથી ગુજરાતના વ્યવસાય – વેપારને નવી દિશા મળી છે તેમ રાજ્યના ઉદ્યોગ મંત્રી જગદીશ પંચાલે અંકલેશ્વર ખાતે 12 માં એઆઇએ ઇન્ડસ્ટ્રીયલ એકસ્પોનું ઉદધાટન કરતાં જણાવ્યું હતું.
અંકલેશ્વર ઇન્ડસ્ટ્રીયલ એસોસીએશન ધ્વારા આયોજિત 12મા એઆઇએ ઇન્ડસ્ટ્રીયલ એકસ્પો 2022 ના ઉદઘાટન કાર્યક્રમ પ્રસંગે ગુજરાત વિધાનસભાના નાયબ મુખ્યદંડક દુષ્યંત પટેલ , અંકલેશ્વર – હાંસોટના ધારાસભ્ય ઇશ્વર પટેલ, AIA પ્રમુખ રમેશ ગાભાણી, પ્રવીણ તેરૈયા સહિતના ઉપસ્થિત રહયા હતા. મંત્રી જગદીશ પંચાલે ઇન્ડસ્ટ્રીયલ એકઝીબીશન રિબીન કાપીને ખુલ્લું મૂકયા બાદ એકસ્પો પ્રદર્શનને રસપૂર્વક નિહાળયું હતું.

એક તરફ વધતા જતા કોરોના ઓમિક્રોન ના પગલે ગુજરાત સરકાર વાઇબ્રન્ટ સમિટ રદ્દ જાહેર કરવામાં આવી છે તો બીજી તરફ સરકારના જ મંત્રીના હસ્તે અંકલેશ્વર ખાતે AIA આયોજીત ઇન્ડસ્ટ્રીયલ એક્સપોનો આરંભ કરવામાં આવ્યો છે.જેમાં સોશ્યલ ડિસ્ટન્સ ની વાત તો દૂર પરંતુ ભાજપના નેતાઓ સહિત ઉદ્યોગપતિઓ પણ વગર માસ્કે જોવા મળ્યા હતા.વળી આ 3 દિવસ ચાલનાર એક્સપોમાં કોરોના સંક્રમણ રહિત રહેશે કે પછી વાઇબ્રન્ટ સમિટ થકી ગુજરાતનું ગ્રોથ એન્જીન બનેલ ઇન્ડસ્ટ્રીયલ એક્સ્પો 2022 ગુજરાતના કેસોમાં વધારો કરવાની સિદ્ધિ હાંસલ કરશે તે તો આવનારા દિવસોજ બતાવશે.પરંતુ હાલ તો માસ્ક વિના પણ સામાન્ય માણસ જ દંડાતો જોવા મળી રહ્યો છે.

• કન્ટેનરનો ચાલક અકસ્માત સર્જી સ્થળ પરથી ફરાર થઇ ગયો

અંકલેશ્વર ખાતે આવેલી રાજપીપળા ચોકડી હાઈવે ઉપરના ફ્લાય ઓવરબ્રિજ પર કન્ટેનર ચાલકે બાઇકને ટક્કર મારતાં ગમખ્વાર અકસ્માત સર્જાયો હતો. આ અકસ્માતની ઘટનામાં એક જ પરિવારની બે મહિલા અને ૧ યુવાનનું ઘટના સ્થળે જ મોત નીપજ્યું હતું. અકસ્માતની આ ઘટનામાં એક જ પરિવારના ૩ સદસ્યોના મોતના પગલે ગમગીની છવાઇ હતી. આ ઘટનામાં ઘટના બાદ કન્ટેનરનો ચાલક અકસ્માત સર્જી સ્થળ પરથી ફરાર થઇ ગયો હતો.

અંકલેશ્વર તાલુકાના અંદાડા ગામની શાંતિ તીર્થ સોસાયટીમાં રહેતો અખિલેશ સિંઘ ઉ.વર્ષ તેની ભાભી પ્રિયંકા અજીત સિંઘ અને ભાભીની પિતરાઈ બહેન નિધિ વિલાસ ચૌધરીને બાઇક નંબર જીજે ૧૬.એ.સી.૧૩૮૦ ઉપર બેસાડી કીમ કોઠવા દરગાહ ખાતે ગયો હતો. જયાંથી પરત આવતી વેળા રાજપીપળા ચોકડી પાસેના ફ્લાય ઓવરબ્રિજ ઉપર પૂરપાટ ઝડપે ધસી આવેલા કન્ટેનર નંબર – એ.પી.૧૨.એચ.૯૨૭૭ના ચાલકે બાઇકને ટક્કર મારતા બાઇક ઉપર સવાર ત્રણેય નીચે પટકાયા હતા.

નીચે પટકાયેલા બાઈકસવારો ઉપરથી કન્ટેનર ફરી વળતાં ત્રણેય કચડાઈ જવા પામ્યા હતા. આ ગમખ્વાર અકસ્માતમાં દિયર-ભાભી સહીત ત્રણેયના ઘટના સ્થળે જ કમકમાટી ભર્યા મોત નીપજ્યાં હતાં. અકસ્માત અંગેની જાણ શહેર પોલીસને થતાં પોલીસનો કાફલો ઘટના સ્થળે દોડી આવ્યો હતો અને મૃતકોના મૃતદેહનો કબજો મેળવી તેને પોસ્ટમોર્ટમ અર્થે ખસેડી વધુ તપાસ હાથ ધરી હતી.