•હવે પ્રવાસીઓ બંને માણી શકશે

•પ્રોજેક્શન મેપિંગ શો સાંજે – 6.45 કલાકે અને નર્મદા આરતી સાંજે 7.30 કલાકે યોજાશે.

પ્રધાનમંત્રી નરેન્દ્ર મોદીની પરિકલ્પના અને પ્રેરણાથી સ્ટેચ્યુ ઓફ યુનિટીનું નિર્માણ કરવામાં આવ્યું છે અને તેઓશ્રીના માર્ગદર્શનમાં જ શૂલપાણેશ્વર મહાદેવ ટ્રસ્ટ દ્વારા વારાણસી ખાતેની ગંગા આરતીની માફક ગોરા ખાતે નવરચિત નર્મદા ઘાટ ખાતે નર્મદા મહાઆરતીની શુભ શરૂઆત કરવામાં આવી છે.

નર્મદા ઘાટ ખાતે નર્મદા આરતી, સ્તવન અને સ્ત્રોતોના મંત્રોચ્ચાર વચ્ચે સાત પંડિતો દ્વારા શાસ્ત્રોક્ત પધ્ધતિથી આરતી કરવામાં આવશે. જેમાં મહા આરતી, નાગ આરતી અને કપૂર આરતીની સમાવેશ થાય છે. મંત્રોચ્ચાર અને શંખધ્વનિ સાથેની આરતીમાં અલૌકિક ધાર્મિક આસ્થાનું વાતાવરણ સર્જાશે. ઘાટ ઉપર સુંદર મનોરમ્ય લાઈટિંગ પણ કરવામાં આવેલ છે.

હાલ બંને આકર્ષણોનો સમય એક હોવાથી પ્રવાસીઓને લાભ મળે તે હેતુસર sou પ્રોજેક્શન મેપિંગ શો ( લેસર શો ) અને નર્મદા મહાઆરતીના સમયમાં ફેરફાર કરવામાં આવ્યો છે.

તે મુજબ sou પ્રોજેક્શન મેપિંગ શો જે હાલમાં સાંજે 7.00 કલાકે યોજાય છે તેના બદલે સાંજે 6.45 કલાકે યોજવામાં આવશે.નર્મદા મહાઆરતી જેનો હાલનો સાંજે 7.00 કલાકે રાખવામાં આવેલ છે તેના બદલે સાંજે 7.30 કરવાનો નિર્ણય કરવામાં આવેલ છે. જેથી લેસર શૉ જોયા પછી પ્રવાસીઓ મહા આરતી માં પણ ભાગ લઈ શકશે.

લેસર શો સાંજે 7.15 કલાકે પૂર્ણ થશે અને તુરંત સ્ટેચ્યુ ઓફ યુનિટી સંકુલની બરાબર બાજુમાં આવેલ બસ સ્ટેશન ખાતેથી નર્મદા મહાઆરતી સ્થળે પહોંચવા માટે પ્લેટફોર્મ નં -૫ અને ૬ થી તેમજ હેલિપેડ ગ્રાઉન્ડ( જંગલ સફારીની સામે ) નર્મદા ઘાટ સુધી જવા બસ સેવા ઉપલબ્ધ થશે.તેમજ મહાઆરતી પૂર્ણ થયેથી વિવિધ પાર્કિંગ સ્થળે જવા માટે પણ બસ સુવિધા ગોરાથી પ્રવાસીઓ માટે ઉપલબ્ધ કરવા સુચારું આયોજન કરવામાં આવેલ છે.

સ્ટેચ્યુ ઑફ યુનિટી ઓથોરિટી અને શુલપાણેશ્વર મહાદેવ ટ્રસ્ટ દ્વારા પ્રવાસીઓને ઉપરોકત સેવા અને આકર્ષણનો લાભ લેવા માટે જાહેર અપીલ કરવામાં આવે છે.

અંકલેશ્વરના જી.આઈ.ડી.સી. વિસ્તારમાં રહેતા હેમંત સોનીની જી.આઇ.ડી.સી.ના સરદાર પાર્ક-2 શોપિંગ સેન્ટરમાં બીજા માળે આભૂષણ જ્વેલર્સ નામની દુકાન આવેલી છે. જે જ્વેલર્સની દુકાન ને મધરાતે તસ્કરોએ નિશાન બનાવી હતી. તસ્કરો એ જ્વેલર્સની દુકાન પાછળ આવેલા બુટ-ચપ્પલના ગોડાઉનમાં શટર તોડી ગોડાઉન માં પ્રવેશ્યા હતા અને અંદરથી ગેસ કતર વડે બાકોરું પાડી દુકાનમાં પ્રવેશ કર્યો હતો. તસ્કરો જ્વેલર્સની શોપમાં રહેલા સીસીટીવી કેમેરાના કેબલ પણ કાપી નાખી તસ્કરો ચોરી કરી ગયા હતા.

અંકલેશ્વરમાં આભૂષણ જવેલર્સમાં સદીની સૌથી મોટી પોણા કરોડ ઉપરાંતની સોના-ચાંદીના આભૂષણોની તસ્કરીની વારદાત સામે આવતા ઔદ્યોગિક ગઢમાં ખલબલી મચી ગઇ છે.
મૂળ રાજસ્થાનના અને અંકલેશ્વર જીઆઇડીસીમાં રહેતા હેમંત જગદીશભાઈ સોનીની સરદાર પાર્ક-2 માં આભૂષણ જવેલર્સની દુકાન આવેલી છે. જવેલર્સના શો રૂમની પાછળ આવેલા પરમ ફૂટવેરના ગોડાઉનનું શટર તોડી તસ્કરો ત્રાટકયા હતા. રેકી અને પ્રિ પ્લાન આવેલા તસ્કરોએ શો-રૂમ તેમજ ગોડાઉનની વચ્ચેની દીવાલમાં બાંકોરું પાડી સદીની સૌથી મોટી સોના-ચાંદીની ચોરીને અંજામ આપ્યો હતો.

તસ્કરો જવેલર્સની શોપમાંથી દોઢ કિલો સોનાના આભૂષણો, 19 કિલો ચાંદીના દાગીના, ₹5.55 લાખના રિયલ ડાયમંડના સેટ સહિત કુલ ₹87.30 લાખની ચોરી કરી જતા સમગ્ર જિલ્લામાં ખળભળાટ મચી ગયો છે. અંકલેશ્વર જીઆઇડીસી પોલીસે ડોગ સ્કવોર્ડ, એફ.એસ.એલ. અને સીસીટીવીની મદદથી આ પોણા કરોડ ઉપરાંતની ગોલ્ડ-સિલ્વરની ચોરીમાં ૪૬ નંગ સોનાની વીંટી,55 જોડી પેન્ડલ બુટ્ટી,૧૧૭ જોડી કાનની બાલી,૧૨૯ પેન્ડલ,૮૩ જોડી ટોપ્સ બુટ્ટી,સોનાનો એક સેટ,૨ સોનાની ચેઇન,૨૯ નાકની જડ,૧૨ જોડી ચિપો,૪૫ જોડી રિયલ ડાયમન્ડ બુટ્ટી પેન્ડલ,૧૯ રિયલ ડાયમંડ પેન્ડટ,૧૩ રિયલ ડાયમંડ,૨૧ પેન્ડટ બુટ્ટી,૫ ડોકિયા ચોરી કરનાર આરોપીઓ સુધી પોહચવા ટીમો બનાવી તપાસ હાથ ધરી છે.

વાલિયાના વટારીયા ગામે કોંગ્રેસ પ્રદેશ મહામંત્રી માનસિંગ ડોડીયાના ફાર્મહાઉસ ઉપર સંગઠનની બેઠક રાખવામાં આવી હતી. જેમાં ગણેશ સુગરના પૂર્વ ચેરમેન સંદીપ માંગરોલાએ હાજરી આપી હોવાની પોલીસને માહિતી મળી હતી.

ગણેશ સુગરના ઉચાપત કૌભાંડમાં સંદીપ માંગરોલાને જિલ્લામાંથી તડીપાર રહેવાના શરતી જમીન મળ્યા હતા. આવા સમયે તેઓની એન્ટ્રીની વિગત મળતા ખાનગી બે ગાડીમાં વાલિયા પોલીસ ફાર્મ હાઉસ ઉપર ત્રાટકી હતી. ફાર્મ હાઉસ અને તેના દરેક રૂમમાં પોલીસે સર્ચ ઓપરેશન હાથ ધર્યું હતું જોકે સંદીપ માંગરોલા મળી આવ્યા ન હતા.

વાલિયાના વટારીયા ગામે કોંગ્રેસ પ્રદેશ મહામંત્રીના ફાર્મહાઉસ ઉપર જિલ્લામાંથી તડીપાર કરાયેલા સંદીપ માંગરોલાની હાજરીને લઇ પોલીસે સર્ચ કરતા કોંગી આગેવાનો પોલીસ સામે રસ્તા ઉપર ધરણાં ઉપર બેસી ગયા હતા.

બીજી તરફ જિલ્લા કોંગ્રેસ પ્રમુખ પરિમલસિંહ રણા, માનસિંગ ડોડીયા, વાલિયા પ્રમુખ ફતેસિંહ, જહાંગીર પઠાણ, રફીક ઝઘડિયાવાલાએ પોલીસની આ વર્તણૂકને પ્રજાની રક્ષક નહિ પણ પક્ષક ગણાવી હતી.પોલીસની આવી કામગીરીના વિરોધમાં જિલ્લા પ્રમુખ સહિત કોંગી આગેવાનો પોલીસ ગાડીની આગળ જ રસ્તા ઉપર ધરણાં ઉપર બેસી જઈ પોલીસ રાજકીય ઈશારે કામગીરી કરી રહી હોવાના ગંભીર આક્ષેપો કર્યા હતા.

• અટલ બિહારી વાજપેયીની જન્મ જયંતિ નિમિત્તે ભાજપ મેડિકલ સેલે ફ્રી મેડિકલ કેમ્પનું આયોજન કર્યુ

ભારત રત્ન સ્વર્ગીય વડાપ્રધાન અટલ બિહારી વાજપેયીની જન્મ જયંતિ નિમિત્તે ભરૂચમાં ઝાડેશ્વર સાંઈ મંદિર ખાતે ભાજપ મેડિકલ સેલ દ્વારા મેડિકલ કેમ્પ યોજાયો હતો. જેમાં નિશુલ્ક બ્લડપ્રેશર અને ડાયાબિટીસનો ચેકઅપ કરવામાં આવ્યો હતો. આ કેમ્પમાં નિષ્ણાંત તબીબોએ સેવા આપી હતી. આ કેમ્પનો વિસ્તારના લોકોએ લાભ લીધો હતો.

નોંધનીય છે કે ભાજપા મેડિકલ સેલ અંકલેશ્વર નોટિફાઈડ મંડળ દ્વારા ડીવાયએસપી કચેરી પાસે નિશુલ્ક બ્લડપ્રેશર અને ડાયાબિટીસ ચેકઅપ કેમ્પ યોજાયો હતો. જે કેમ્પમાં નિષ્ણાંત ડોક્ટરોએ સેવા આપી હતી. આ કેમ્પમાં ડો. ગૌરાંગ પટેલ, ડો. સંદીપ વાંસદીયા સહિતના તબીબો ઉપસ્થિત રહ્યા હતા.

દેશના પૂર્વ વડાપ્રધાન સ્વ. અટલ બિહારી વાજપેયીના જન્મદિવસની આ રીતે જિલ્લા ભાજપ દ્વારા ઉજવણી કરવામાં આવી હતી. ભરૂચના સ્ટેચ્યુ પાર્ક ખાતે ભરૂચ જીલ્લા ભાજપ તથા મહિલા પાંખ દ્વારા દેશના પૂર્વ વડાપ્રધાન સ્વ. અટલ બિહારી વાજપેયીના જન્મદિવસની ઉજવણી કરતો કાર્યક્રમ યોજાયો હતો. જેમાં ભાજપના જિલ્લા પ્રમુખ મારુતિસિંહ અટોદરિયા તથા જિલ્લાના આગેવાનો અને હોદ્દેદારો તથા મહિલા સંગઠનના સભ્યોની ઉપસ્થિતિમાં સ્વ. વાજપેયીજીની તસ્વીર સમક્ષ ફૂલહાર અર્પણ કરી તેમને શ્રદ્ધાંજલિ પાઠવવામાં આવી હતી.

કેસની ટૂંકમાં વિગત એવી છે કે વર્ષ ૨૦૧૮માં ભોગબાનનાર ઉમ્મર વર્ષ ૧૬, ૦૨ માસની બપોરના સમયે પોતાના ગામ શાહપુરાના તળાવ પાસે આવેલ ખેતરમાં ચારો કાપવા ગયેલ ત્યારે નાંદ ગામના રહીશો નામે સતિશ શના વસાવા, રાહુલ રણજીત વસાવા તથા શિવમ ઉર્ફે શિવા બુધા વસાવાનાઓએ તેની ની એકલતા નો લાભ લઈ તેની સાથે બળાત્કાર ગુજારેલ અને ધમકી આપેલ કે જો કોઈને કહીશ તો જાનથી મારી નાખીશું. જેથી તેણીએ આ બનાવ સંબંધે કોઈને ઘરમાં જાણ કરેલ નહીં અને તેણીને ગર્ભ રહી જતાં બનાવના સાતેક મહિના બાદ તેણીની માતાને ખબર પડતાં માતાએ પૂછતાં આખી ઘટના તેણીએ જણાવેલ.

આ બાબતે ભોગબાનનારના પિતાએ ત્યારબાદ તારીખ ૧૪/૧૧/૨૦૧૮ના રોજ નબીપુર પોલીસ સ્ટેશનમાં પોતાની ફરિયાદ નોંધાવેલ જેની તપાસ દરમ્યાન ભોગ્બનનારે બાળકને જન્મ આપેલ. જેથી પોલીસે ભોગબાનનાર, તેણીના બાળક તેમજ આરોપીઓના લોહીના ડી.એન.એ. ટેસ્ટ કરાવડાવેલ જેમાં આરોપીઓ પૈકી આરોપી શિવમ ઉર્ફે શિવા બુધા વસાવાના ડી.એન.એ. મેચ થયા અંગેનો રિપોર્ટ મળેલ. તપાસ પૂર્ણ થઈ આરોપીઓ પૈકી આરોપી સતીશ શના વસાવાની ઉંમર ૧૮ વર્ષથી ઓછી હોય તેની અલગ ચાર્જશીટ કરેલ અને અન્ય બે આરોપીઓ રાહુલ અને શિવમ વિરૂદ્ધ પોકસો કોર્ટમાં ચાર્જશીટ દાખલ થતાં કેસ ચાલવા પર આવતા સરકાર તર્ફે મદદનીશ જિલ્લા સરકારી વકીલ અને વધારાના પબ્લિક પ્રોસિક્યુટર આર. જે. દેસાઇએ હાજર થઈ કેસ ચલાવેલ.

જે કેસમાં ગઈ તારીખ ૨૨/૧૨/૨૦૨૧ના રોજ પોકસો અદાલતના જજ એમ. એસ. સોનીએ આરોપી રાહુલ ને શંકાનો લાભ આપી છોડી મુકેલ અને આરોપી શિવમ ઉર્ફે શિવા બુધા વસાવાને તકસીરવાર ઠેરવતો ચુકાદો જાહેર કર્યો છે અને આરોપી શિવમ ઉર્ફે શિવાને ભારતીય દંડ સંહિતા ની કલમ ૩૭૬ અન્વયે ૭ વર્ષની સખ્ત કેદ અને રૂ. ૫,૦૦૦/- દંડ અને દંડ ન ભારે તો વધુ ૬ માસની કેદ તેમજ પોકસોના કાયદાની કલમ ૬ અન્વયે ૧૦ વર્ષની સખ્ત કેદ અને રૂ. ૧૦,૦૦૦/- દંડ અને દંડ ન ભરે તો વધુ ૬ માસની કેદ તેમજ તે જ કાયદાની કલમ ૧૨ અન્વયે ૧ વર્ષની સખ્ત કેદ અને રૂ. ૧૦૦૦/- દંડ અને દંડ ન ભારે તો વધુ ૧૫ દિવસની કેદની સજા ફરમાવી છે, તેમજ બધી સજા એક સાથે ફરમાવવા હુકમ કર્યો છે. જેથી મહત્તમ સજા ૧૦ વર્ષની સખ્ત કેદની સજા ભોગવવાનો હુકમ કર્યો છે.

વડોદરા વિભાગના રેલવે સ્ટેશનોનું વાર્ષિક નિરીક્ષણ પશ્ચિમ રેલ્વેના જનરલ મેનેજર આલોક કંસલ દ્વારા કરવામાં આવ્યું હતું. જેમાં તેમણે અંકલેશ્વર, ભરૂચ સ્ટેશન પર પેસેન્જર સુવિધાઓનું પણ નિરીક્ષણ કર્યું હતું.

પશ્ચિમ રેલ્વેના જનરલ મેનેજર કંસલે અકલેશ્વર ખાતે વળાંક અને ભરૂચ ખાતે નેરોગજ કમાન બ્રિજ નંબર 500 A નું સંપૂર્ણ નિરીક્ષણ કર્યું હતું. આ દરમિયાન તેમણે અંકલેશ્વર ખાતે બનાવવામાં આવેલ ઓપન એર જીમ અને ગાર્ડન લાઈટિંગ અને હાઈ વોલ્યુમલો સ્પીડ (HVLS) પંખાનું પણ ઇ-ઉદ્ઘાટન કર્યું હતું. અને સ્ટેશન બિલ્ડીંગમાં સ્થાપિત કરેલ લાઈટિંગ ઇ-ઉદ્ઘાટન કર્યું હતું છે.

જનરલ મેનેજર કંસલે ભરૂચ સ્ટેશન પર વિવિધ વિભાગો દ્વારા મુકવામાં આવેલ પ્રદર્શનને રસપ્રદ રીતે નિહાળ્યું અને સોલાર વોટર કુલર, ડીજી સેટ, નેરોગજ બાજુએ બી.જી. કોલોની ખાતે રિનોવેટેડ ચિલ્ડ્રન પાર્ક, સુએજ ટ્રીટમેન્ટ પ્લાન્ટ, મિયાવાકી ફોરેસ્ટ રિનોવેટેડ રેલ્વે ઇન્સ્ટિટ્યુટ અને વોલીબોલ ગ્રાઉન્ડ, ઇન સિટુ રિપ્લેસમેન્ટ અને એનર્જી કન્ઝમ્પશન એન્ડ રિજનરેશનના વિશ્લેષણ માટે કાર્યક્રમ, TRO ઇ-બુકના વિકાસનું પણ ઇ-ઉદ્ઘાટન કરવામાં આવ્યું હતું.

કંસલે ભરૂચમાં રેલ્વે કોલોની અને સ્ટેશનનું નિરીક્ષણ કર્યું હતું અને કોલોનીના રહેવાસીઓ સાથે વાતચીત કરી તેમની સમસ્યાઓ જાણી હતી. નિરીક્ષણ દરમિયાન, કંસલે જન પ્રતિનિધિઓ, મહાનુભાવો, પ્રાદેશિક સલાહકાર સમિતિ અને મંડળ સલાહકાર સમિતિના સભ્યો, માન્ય ટ્રેડ યુનિયનો અને સંગઠનોના અધિકારીઓ સાથે ચર્ચા કરી હતી પણ બે કલાક ઉપરાંત રાહ જોવડાવ્યા બાદ પ્રેસ અને મીડિયા સાથે વાત કરવાનું ટાળ્યું હતું.

આ નિરીક્ષણ દરમિયાન, જનરલ મેનેજર કંસલ સાથે, વિવિધ વિભાગોના મુખ્ય વડાઓ અને વડોદરા વિભાગના ડીઆરએમ અમિત ગુપ્તા, વરિષ્ઠ શાખા અધિકારીઓ અને રેલવે કર્મચારીઓ પણ ઉપસ્થિત રહ્યા હતા.