ગુજરાત સરકારના કરુણા અભિયાન અંતર્ગત, આગામી ઉતરાયણના પર્વ દરમિયાન જે કોઈ સંસ્થા, ગ્રુપ કે સ્વયંસેવક, ઘાયલ પક્ષીની સારવાર માટે કેમ્પનું આયોજન કરી રહ્યાં હોય એમના માટે ભરૂચ વનવિભાગ દ્વારા બેઠક અને પ્રશિક્ષણ શિબિરનું રોટરી ક્લબ હોલ, ભરૂચ ખાતે આયોજન કર્યું હતું.

જેમાં નાયબ વન સંરક્ષક ભાવનાબેન દેસાઈની અધ્યક્ષતામાં અને વનવિભાગના અન્ય અધિકારીઓની હાજરીમાં રોટરીકલબ, બર્ડ રેસ્ક્યુઅર્સ ભરૂચ, મનમૈત્રી સેવા સંસ્થા, એન.પી.સી.ટી. વગેરે સંસ્થાઓએ હાજરી આપી હતી.

બર્ડ રેસ્ક્યુઅર્સ ભરૂચના આકાશભાઈ પટેલે પક્ષીઓને બચાવવાની જરૂરિયાત, તેની પ્રાથમિક સારવાર અને વેટરનરી ટ્રીટમેન્ટ સુધી ટ્રાન્સપોર્ટેશન કેમ કરવું તેને લગતું પ્રેઝન્ટેશન આપ્યું તેમજ ટીમ સાથે ઘવાયેલા કબુતરને કેવી રીતે પકડવું તેનો પ્રેક્ટિકલ ડેમો સાથે લાવેલ કબુતરને લઈ સૌને સમજાવ્યો.

મનમૈત્રી સેવા સંસ્થાના વેટરનરી ડૉકટરે જરૂરી દવાઓ અને પક્ષી હેન્ડલીગ સમજાવતું પ્રેઝન્ટેશન આપ્યું હતું. વન વિભાગ દ્વારા કરૂણા અભિયાન અંતર્ગત રાજ્ય વ્યાપી પ્રસારિત વિડિઓ સૌને બતાવ્યો હતો. રોટરી કલબ ભરૂચના હાલના પ્રેસિડેન્ટ ડૉ. વિક્રમે સૌ સંસ્થાને હળીમળી પક્ષી બચાવવાની કામગીરી કરવા જણાવ્યું હતું.

અંકલેશ્વર GIDCમાં દુર્ઘટનામાં 4 લોકો મોતને ભેટ્યા છે. ઘટનાને પગલે પોલીસ, પ્રશાસન, એમ્બ્યુલનસો દોડતી થઈ જવા સાથે સાયરનોની ગુંજ અને લોકોની બુમરાણથી ઔદ્યોગિક નગરી અંકલેશ્વર ગુંજી ઉઠ્યું હતું.

અંકલેશ્વર GIDC માં આવેલી પ્લાસ્ટોકોન કંપની પ્લાસ્ટિકની ટાંકીઓ, પેલેટ્સ અને મોડુયલરો બનાવે છે.કંપનીમાં સિવિલ વર્કનું કામ ચાલી રહ્યું હતું. જે માટે કોન્ટ્રાકટના માણસો દ્વારા દીવાલ બનાવવાની કામગીરી થઈ રહી હતી. કોન્ટ્રકટર અને અન્ય કામદારો 6 ફૂટની દીવાલ ઉપર ઇંટો મૂકી ચણતર કરી રહ્યા હતા ત્યારે જ ધડાકાભેર દીવાલ તૂટી પડતા મજૂરો દટાઈ ગયા હતા.કામદારોની ચિચિયારીઓ વચ્ચે કંપની પરિસર ગુંજી ઉઠવા સાથે ત્રણ રસ્તા પર જ આવેલી કંપનીમાં દુર્ઘટનાની જાણ થતાં જ સ્થળ ઉપર ટોળે ટોળા એકત્ર થઈ ગયા હતા. દીવાલ ધરાશયી થવાની ઘટનામાં કોન્ટ્રકટર તેમજ એક મહિલા સહિત 4 લોકોના સ્થળ ઉપર જ મોત થયા હતા.જ્યારે અન્ય 3 લોકો દિવાલના કાટમાળ નીચે દબાતા પગે, હાથે ફેક્ચર સાથે શરીરે ઇજાઓ પોહચી હતી. રાહત બચાવની કામગીરી હાથ ધરવા સાથે 108 એમ્બ્યુલન્સ, પોલીસ અને વહીવટી તંત્ર સ્થળ પર દોડી આવ્યું હતું.મૃતદેહો તેમજ ઇજાગ્રસ્તોને બહાર કાઢવામાં આવ્યા હત. ત્રણ ઘાયલોને જયાબેન મોદી હોસ્પિટલમાં ખસેડવામાં આવ્યા હતા. જોકે ઘટનામાં કોન્ટ્રકટર કોણ હતો તેની પણ પુષ્ટિ થઈ ચૂકી ન હતી.ઘટનામાં મૃત્યુ પામેલા લોકોમાં સંગીતાદેવી સુરેશ મંડલ, ઉ.વ.30, હાલ રહે સારંગપુર, મૂળ બિહાર ગોપાલ જેસિંગ રાજપૂત ઉ.વ.45, હાલ રહે. સારંગપુર, મૂળ બિહાર સંજય રણછોડ વસાવા ઉ.વ. 30 , રહે. આમોદમૌલા તોહસીન અંસારી ઉ.વ. 42નો સમાવેશ થાય છે.બનાવની તપાસ જીઆઇડીસી પોલીસ ચલાવી રહી છે.

ભરૂચ જિલ્લા કલેકટરે દિવ્યાંગ બાળકો સાથે કેક કાપી પોતાના પુત્રનો જન્મદિન ઉજવ્યો હતો. અસ્મિતા વિકાસ કેન્દ્ર સંસ્થામાં ભરૂચ જિલ્લાના સમાહર્તા તુષાર સુમેરા તેમના સંપૂર્ણ પરિવાર સાથે તેમના પુત્ર ચિ. મૃગાંક ના જન્મ દિનની ઉજવણી માટે ગયા હતા. સંસ્થા ના દિવ્યાંગ બાળકો સાથે કેક કાપી ને જન્મદિનની ની ઉજવણી કરવામાં આવી હતી. એટલુંજ નહીં પરંતુ કલેકટર તરફથી આ સંસ્થા ના દિવ્યાંગ બાળકો માટે નાસ્તો તથા આખા દિવસનું સુરુચિ ભોજન આપવાનું આયોજન પણ કરવામાં આવ્યું હતું.

જન્મદિનની ઉજવણી બાદ સંસ્થાના વિવિધ પ્રોજેક્ટનું ઉદઘાટન પણ સમાહર્તાના હસ્તે કરવામાં આવ્યું હતું. જેમાં ” ડેકોરેટિવ & ઇનોવેટિવ ક્લાસીસ ” તથા ” કોમ્પ્યુટર ક્લાસીસ ” નું પણ ઉદ્ઘાટન કરવામાં આવ્યું હતું.

જિલ્લા કલેકટરે સંસ્થા ના વિવિધ વિભાગોની મુલાકાત લીધી હતી અને સંસ્થા ના સારા સેવાકીય કાર્ય ને બિરદાવ્યું હતું. આ શુભ અવસરે કલેકટર ના પરમ મિત્ર (ઈન્કમટેક્સ જોઇન્ટ કમિશનર અમદાવાદ, તેમના પૂજ્ય માતા- પિતા , તેમના ધર્મપત્ની સાથે સંપૂર્ણ પરિવાર અને જિલ્લા સમાજ સુરક્ષા અધિકારી એ.વાય. મંડોરી સહિત અસ્મિતા સંસ્થાના પ્રમુખ યશવંતભાઈ પટેલ , ઉપપ્રમુખ મગનભાઈ હનિયા , મેનેજિંગ ટ્રસ્ટી સમીરભાઈ પટેલ તથા ખજાનચી કિર્તીભાઈ પટેલ હાજર રહ્યા હતા.

આજે દેડીયાપાડામાં ભારત સેવાશ્રમ સંઘ ખાતે અંદાજે રૂા.૫૦ લાખના ખર્ચે સ્વ.ગૌરીબેન કાનજીભાઈ કાકડીયા કુમાર છાત્રાલયના ૧૦૮ માં ભવનના યોજાયેલા લોકાર્પણ સમારોહને દિપ પ્રાગટ્ય દ્વારા ખૂલ્લો મૂકાયો હતો.

જેમાં જિલ્લા પ્રભારી મંત્રી પૂર્ણેશભાઇ મોદીએ જણાવ્યું હતું કે, ૧૯૪૭ પછી દેશની આઝાદીમાં ક્રાંતિકારી મહાપુરુષોએ આપેલા યોગદાનથી વર્તમાન અને ભાવિ પેઢી માહિતગાર થાય તે હેતુથી દેશના વડાપ્રધાન નરેન્દ્રભાઈ મોદીએ આઝાદીના અમૃત મહોત્સવની ઉજવણી હાથ ધરી છે, ત્યારે સ્વામી દયાનંદ સરસ્વતી, સ્વામી વિવેકાનંદજી, સ્વામી પરમાનંદ મહારાજ અને ડૉ.હેડગેવાર વગેરે જેવા મહાપુરૂષો-સંતો-મહંતોએ છેવાડાના માનવી માટેની કલ્યાણકારી પ્રવૃત્તિઓ દ્વારા ભારતીય સંસ્કૃતિના જતન અને સંવર્ધન ક્ષેત્રે વિશેષ યોગદાન આપ્યું છે તેનો પણ મંત્રીએ સવિસ્તાર ઉલ્લેખ કર્યો હતો.

ગુજરાતમાં અંબાજીથી ઉમરગામ સુધીના આદિવાસી વિસ્તારમાં ભારત સેવાશ્રમ સંઘ દ્વારા ભારતવર્ષમાં અનેક જગ્યાએ આવી સંસ્થાઓની સ્થાપના-કાર્યરત કરીને અગાઉના વર્ષોમાં જ્યારે વીજળી, રસ્તા, પાણી વગેરે જેવી પ્રાથમિક સુવિધા ઉપલબ્ધ ન હતી તેવા સમયે આવા વિસ્તારોમાં શિક્ષણની જ્યોત પ્રગટાવીને આદિવાસી સમાજને બેઠો કરવા માટે કરેલા પ્રયાસો સરાહનીય છે, ત્યારે સરકાર દ્વારા પણ અંબાજીથી ઉમરગામ સુધીના આદિવાસી વિસ્તારમાં શિક્ષણનો વ્યાપ વિસ્તારવા સહિતના સર્વાંગીન વિકાસ માટે અમલી બનાવાયેલી કલ્યાણલક્ષી યોજનાઓની જાણકારી પણ મંત્રી મોદીએ આપી હતી.

મંત્રી પૂર્ણેશભાઇ મોદીએ વધુમાં ઉમેર્યુ હતું કે, સમાજમાં જરૂરિયાતમંદ વ્યક્તિઓને મદદરૂપ થવાની ભારતીય સંસ્કૃતિ એકબીજાને જોડવાનું કામ કરે છે, ત્યારે આદિવાસી સમાજમાં શિક્ષણનું પ્રમાણ વધે તે માટે કેશુભાઈ ગોટી જેવા સમાજ શ્રેષ્ઠીઓ ભારત સેવાશ્રમ સંઘના માધ્યમથી છાત્રાલય જેવી સુવિધાઓ પૂરી પાડવાનું ભગીરથ કાર્ય કરી રહ્યાં છે, જે ખૂબ જ નોંધનીય અને આવકારદાયક છે. અહીં શિક્ષણ લઇ રહેલા વિદ્યાર્થીઓને ભવિષ્યમાં આ સંસ્થાની મુલાકાત લઇ પોતાનાથી યથાયોગ્ય સહયોગ અપાય તેવી લાગણી વ્યક્ત કરી આ સંસ્થા ભવિષ્યમાં વટવૃક્ષ બને તેવી શુભેચ્છા પણ તેમણે વ્યક્ત કરી હતી.

આ પ્રસંગે મંત્રી પૂર્ણેશભાઇ મોદી અને ભારત સેવાશ્રમ સંઘના પ્રમુખ પ.પૂ સ્વામી અમરીશાનંદજી મહારાજના હસ્તે કુમાર છાત્રાલયના દાતા કાકડીયા પરિવારના દેવજીભાઈ કાકડીયા અને વલ્લભભાઈ કાકડીયા તેમજ સહયોગી દાતા માતૃ કાશીબા હરીભાઈ ગોટી ચેરીટેબલ ટ્રસ્ટના પ્રમુખ કેશુભાઈ ગોટીને સન્માનપત્ર એનાયત કરવાં ઉપરાંત કર્મયોગી ટીમના સભ્યો તેમજ અન્ય મહાનુભાવો-દાતાઓ વગેરેનું અભિવાદન કરી તેમને સન્માનિત કરાયાં હતાં.
આ પ્રસંગે જાનકી આશ્રમના બાલિકાઓ દ્વારા પ્રાર્થના, સ્વાગત ગીત, યોગ, ગરબો, પિરામિડ વગેરે જેવી કૃતિઓ રજૂ કરાઈ હતી તેમજ ઉપસ્થિત દાતાઓ તરફથી આ તમામ કૃતિઓ રજૂ કરનાર બાલિકાઓ-વિદ્યાર્થીંઓને હજારો રૂપિયાના રોકડ પુરસ્કાર એનાયત કરી તેમને પ્રોત્સાહિત કરાયાં હતાં.

આ પ્રસંગે ભારત સેવાશ્રમ સંઘના પ્રમુખ પ.પૂ સ્વામી અમરીશાનંદજી મહારાજ, કેશુભાઈ ગોટી, દિપકભાઈ, મનોજભાઇ તેરૈયા વગેરેએ પ્રાસંગિક પ્રવચનો કર્યા હતાં. સમગ્ર કાર્યક્રમનું સંચાલન મનિષભાઇ વઘાસીયાએ કર્યુ હતું.

આ કાર્યક્રમમાં ગુજરાતના માર્ગ અને મકાન, વાહન વ્યવહાર, નાગરિક ઉડ્ડયન, પ્રવાસન અને યાત્રાધામ વિકાસ વિભાગના મંત્રી અને નર્મદા જિલ્લાના પ્રભારી મંત્રી પૂર્ણેશભાઇ મોદી, જિલ્લા પંચાયતના પ્રમુખ પર્યુષાબેન વસાવા, દેડીયાપાડા તાલુકા પંચાયતના પ્રમુખ તારાબેન રાઠોડ, નર્મદા જિલ્લા પંચાયતની વિવિધ સમિતીના અધ્યક્ષ શાંતાબેન વસાવા, સોમાભાઈ વસાવા, પૂર્વ ધારાસભ્ય મોતીસિંહ વસાવા, ભરૂચ દૂધધારા ડેરી અને નર્મદા સુગર ફેક્ટરીના ચેરમેન ઘનશ્યામભાઇ પટેલ, જિલ્લા પંચાયતના પૂર્વ પ્રમુખ શંકરભાઇ વસાવા, જિલ્લાના અગ્રણી રણજીતભાઇ ટેલર, માતૃ કાશીબા હરીભાઈ ગોટી ચેરીટેબલ ટ્રસ્ટના પ્રમુખ કેશુભાઈ ગોટી, ભારત સેવાશ્રમ સંઘ-સુરતના પ્રમુખ પ.પૂ સ્વામી અમરીશાનંદજી મહારાજ અને મંત્રી (દેડીયાપાડા) પ.પૂ.સ્વામી બોધમિત્રાનંદજી, દાતા પરિવાર, સંતો-મહંતો-અગ્રણીઓ સહિતના અન્ય પદાધિકારીઓ/અધિકારીઓ વગેરે ઉપસ્થિત રહ્યા હતા.

•વુમન ક્રિકેટરો પણ પોતાની ઓળખ બનાવી આ ફિલ્ડમાં સારૂ પ્રદર્શન કરે તે આશય

•ગુજરાત વિધાનસભાના નાયબ મુખ્ય દંડક દુષ્યંત પટેલે હાજરી આપી

નેત્રંગ-રાજપારડી રોડ ઉપર આવેલ બલેશ્વર ગામના ચંદ્રકાંત વસાવાએ પોતાની દીકરી મુસ્કાનનો ક્રિકેટ પ્રત્યેનો પ્રેમ અને ક્રેઝ જોઈ પોતાના ખેતરને ગ્રાઉન્ડમાં ફેરવી નાખ્યું હતું.નેત્રંગ તાલુકા સહિત આજુબાજુના વિસ્તારના ક્રિકેટ પ્રેમીઓ પ્રેક્ટિસ કરે છે.ચંદ્રકાંત વસાવાની મહેનત રંગ લાવી છે.

આજની યુવાપેઢીમાં ક્રિકેટની રમત પ્રત્યેનો ક્રેઝ વધારે છે.ત્યારે વુમન ક્રિકેટર પણ ઘર આંગણે પોતાની ઓળખ બનાવી ક્રિકેટની ફિલ્ડમાં સારૂ પ્રદર્શન કરે તે હેતુથી સ્વ.મધુબેન ફતેસિંહ વસાવા ટ્રોફી ઇન્ટર સ્ટેટ વુમન ક્રિકેટ ટુર્નામેન્ટ ૨૦૨૦- ૨૧નું આયોજન કરાયું હતું.જેમાં ગુજરાતની ૭ અને મહારાષ્ટ્રની પણ બે ગર્લ્સ ટીમોએ ભાગ લીધો હતો.
ભરૂચ,સુરત-૧ સુરત-૨ વલસાડ,આણંદ,અમદાવાદ,નવસારી અને નાસીક અને અમરાવતી (મહારાષ્ટ્ર) ની જેવી અંડર -૧૯ ગર્લ્સ ટીમોએ ભાગ લીધો હતો.જેની ફાઈનલ મેચ ગુજરાત વિધાનસભાના નાયબ મુખ્ય દંડક અને ભરૂચ ક્રિકેટ એસોસિયેશનના પ્રમુખ દુષ્યંત પટેલની ઉપસ્થિતમાં યોજાઇ હતી. જેમાં ટુર્નામેન્ટ જીતનાર સુરતની ટીમને ટ્રોફી આપી અભિવાદન કરાયુ હતું.

•ઇકરામ,ન્યુઝલાઇન, નેત્રંગ.

ભરૂચ જીલ્લામાં દારૂ/જુગારની ગેરકાયદેસરની પ્રવૃતી અટકાવવા તેમજ શોધી કાઢવા સારૂ સુચના મળતા ભરૂચ શહેર ”એ“ ડીવીઝન પોલીસ ટીમ દ્વારા કેશો શોધી કાઢવા પ્રયત્નો હાથ ધરવામા આવ્યા હતા. તે દરમીયાન પોલીસ ટીમને બાતમી મળેલ કે રામ માછી નામનો વ્યક્તિ ધોળીકૂઇ વિસ્તારમા આવેલ ભાથીજી દાદાના ટેકરા ખાતે વિદેશી દારૂનું ગેરકાયદેસર વેચાણ કરે છે.

જેથી એ ડિવિઝન પોલીસ ટીમે બાતમી હકીકત આધારે ભાથીજી દાદાના ટેકરા ખાતેથી બરાનપુરામા રહેતા બુટલેગર રામ સોમાભાઇ માછીને વિદેશી દારૂની નાની મોટી બોટલ નંગ-૨૦૪, કી.રૂ.૮૧,૮૪૦/- તથા મોબાઇલ નંગ-૦૧ કિ.રૂ.૫૦૦/- મળી કુલ કિ રૂ. ૮૨, ૩૪૦/- ના મુદ્દામાલ સાથે રામ સોમાભાઇ માછી રહે-એ/૫૪૧, બરાનપુરા ખત્રીવાડ, ભરૂચને ઝડપી પાડી તેના વિરૂધ કાયદેસરની કાર્યવાહી હાથધરી છે.