ભરૂચ નગરપાલિકાના વોર્ડ નં. ૬ માં સમાવિષ્ટ મકતમપુર ગામમાં અંદાજે ₹૧.૪૬ કરોડના ખર્ચે તૈયાર કરવામાં આવેલો ‘લેક એટ’ ગાર્ડન વહીવટી તંત્રની બેદરકારી અને જાળવણીના અભાવે હાલ ખંડેર હાલતમાં ફેરવાઈ ગયો છે. વર્ષ ૨૦૨૨માં સ્વર્ણિમ જયંતિ મુખ્યમંત્રી શહેરી વિકાસ યોજના હેઠળ બનેલા આ ગાર્ડનમાં છેલ્લા ૫ વર્ષથી પાણી ન ભરાતા તળાવમાં ઝાડી-ઝાંખરા ઊગી નીકળ્યા છે, જેના કારણે આ સ્થળ હાલ દારૂડિયાઓ અને અસામાજિક તત્વો માટે આશ્રયસ્થાન બની ગયું હોવાના ગંભીર આક્ષેપો સ્થાનિકો દ્વારા કરવામાં આવ્યા છે.
પ્રોજેક્ટની વિગતો અને વર્તમાન દયનીય સ્થિતિ
મકતમપુર ગામ છેલ્લા ૧૫ વર્ષથી ભરૂચ નગરપાલિકાની હદમાં સમાવિષ્ટ છે. સ્થાનિક રહીશો, ખાસ કરીને સિનિયર સિટીઝનો અને સવારે ચાલવા નીકળતા લોકોને શાંત અને સુવિધાજનક વાતાવરણ મળી રહે તે હેતુથી વર્ષ ૨૦૨૨માં તત્કાલીન પી.ડબલ્યુ.ડી. (PWD) ચેરમેન હેમુબેન પટેલ દ્વારા આ પ્રોજેક્ટ મંજૂર કરાયો હતો. ‘સ્વર્ણિમ જયંતિ મુખ્યમંત્રી શહેરી વિકાસ યોજના’ (આઉટ ગ્રોથ ગ્રાન્ટ) અંતર્ગત અંદાજે ₹૧,૪૬,૮૨,૩૦૦ના ખર્ચે ‘ડિઝાઇનિંગ, ડેવલપિંગ એન્ડ બ્યુટીફિકેશન ઓફ મકતમપુર લેક એટ’નું કામ રીટાબેન પટેલ નામની એજન્સીને સોંપવામાં આવ્યું હતું.
કામ પૂર્ણ થયા બાદ ગાર્ડનનું લોકાર્પણ તો કરાયું, પરંતુ ત્યારબાદ નગરપાલિકા દ્વારા તેની જાળવણી માટે કોઈ કાયમી કર્મચારીની નિમણૂક કરવામાં આવી નથી. પરિણામે, ગાર્ડનની ફરતે બનાવેલી દીવાલો જર્જરિત થઈ ગઈ છે અને ઘણી જગ્યાએથી તૂટી ગઈ છે. આ ઉપરાંત, પૂર્વ પ્રમુખ વિભૂતિબા યાદવના નામ સાથે મુકાયેલા બાંકડાઓ પણ તૂટેલી અને છૂટા કરી દેવાયેલી હાલતમાં રઝળી રહ્યા છે. ચોમાસાનું કે નગરપાલિકાનું પાણી તળાવમાં ન આવતા આખું તળાવ બિનઉપયોગી બની ગયું છે.
સુરક્ષા અને સ્વચ્છતાના ધજાગરા
ગાર્ડનમાં યોગ્ય દેખરેખ ન હોવાથી રાત્રિના સમયે દારૂની મહેફિલો જામે છે અને ઠેર-ઠેર દારૂની ખાલી બોટલો, ગ્લાસ તથા કચરાના ઢગલા જોવા મળે છે. ગાર્ડનમાં વીજળીના વાયરો પણ ખુલ્લા અને જોખમી હાલતમાં લટકી રહ્યા છે, જેના કારણે કોઈ મોટી અઘટિત ઘટના બનવાની દહેશત સ્થાનિકો સેવી રહ્યા છે. એક તરફ નગરપાલિકા જાહેરમાં કચરો ફેંકતી જનતા પાસેથી દંડ વસૂલે છે, ત્યારે બીજી તરફ પોતાના જ હસ્તકના કરોડોના ગાર્ડનની સફાઈ કરવામાં સદંતર નિષ્ફળ નીવડી છે.
પ્રતિક્રિયાઓ અને આક્ષેપ-પ્રતિઆક્ષેપ
• વિભૂતિબા યાદવ (પૂર્વ પ્રમુખ અને સ્થાનિક નગરસેવક):
“ગાર્ડનની આવી હાલત અંગે હું તપાસ કરાવીશ. જો ગંદકી કે બાંકડા તૂટ્યા હોવાનું જણાશે, તો તાત્કાલિક સાફ-સફાઈ કરાવીશું અને જરૂર પડ્યે નવા બાંકડા મુકાવી લોકોની સુવિધા પુનઃસ્થાપિત કરવામાં આવશે.”
• હેમુબેન પટેલ (સ્થાનિક નગરસેવક):
“વર્ષ ૨૦૨૨માં હું PWD ચેરમેન હતી ત્યારે વિસ્તારના લોકોની સુવિધા માટે દોઢ કરોડની ગ્રાન્ટમાંથી આ ગાર્ડન બનાવડાવ્યો હતો. પરંતુ ત્યારબાદ નગરપાલિકા તેની જાળવણી કરવામાં નિષ્ફળ રહી છે. અમે તંત્રનું ધ્યાન દોરીને ગાર્ડનને ફરીથી સુવિધાજનક બનાવવા પ્રયાસ કરીશું.”
• જીગ્નેશ બ્રહ્મભટ્ટ (કોંગ્રેસ નગરસેવક):
“ભરૂચ નગરપાલિકાનું શાસક પક્ષ મનમાની ચલાવી પાલિકાને દેવામાં ડુબાડી રહ્યું છે. જો સમયસર જાળવણી કરી હોત તો દોઢ કરોડનું આ ગાર્ડન લોકો માટે આશીર્વાદરૂપ બન્યું હોત. હવે રિપેરિંગના નામે ફરીથી લાખો રૂપિયાની ગ્રાન્ટ વાપરીને પ્રજાના પૈસાનો વ્યય કરવામાં આવશે.”
• સ્થાનિક રહીશોનો રોષ:
સ્થાનિકોના જણાવ્યા મુજબ, ગાર્ડનમાં સુરક્ષા કર્મચારી ન હોવાથી અસામાજિક તત્વોનો ત્રાસ વધ્યો છે અને ખુલ્લા વીજ વાયરો જોખમી બન્યા છે. વધુમાં, રહીશોએ રોષ વ્યક્ત કરતા કહ્યું હતું કે તળાવ પાછળ દોઢ કરોડ રૂપિયા વેડફવાને બદલે જો આ જ રકમ નારાયણ હોસ્પિટલ નજીક આવેલી ખુલ્લી અને બ્લોક ગટરની સમસ્યા ઉકેલવા પાછળ ખર્ચી હોત, તો લોકોને મચ્છરના ઉપદ્રવ અને રોગચાળામાંથી કાયમી મુક્તિ મળી હોત.






