અંકલેશ્વર GIDCમાં હિટ એન્ડ રનનો બનાવ બન્યો છે. એશિયન પેઇન્ટ ચોકડી નજીક રોડ ક્રોસ કરી રહેલા પીકઅપ ચાલકનું અજાણ્યા વાહનની ટક્કરે કરુણ મોત નીપજ્યું હતું.મૃતક યુપીના રસુલપુરના સરિયા બજારના રહેવાસી 34 વર્ષીય સુધીરકુમાર લલનસિંગ હતા. તેઓ જય દુર્ગા રોડલાઇન્સમાં ડ્રાઇવર તરીકે નોકરી કરતા હતા.
સુધીરકુમાર અંકલેશ્વર GIDCની જૈન પેકેજિંગ કંપનીમાંથી પીકઅપમાં લાકડાનું પાયલેટ ભરી હાલોલ જવા નીકળ્યા હતા.તેમણે પોતાનું વાહન એશિયન પેઇન્ટ ચોકડીથી આગળ મારુતિ ઇલેક્ટ્રિક શોરૂમ સામે પાર્ક કર્યું હતું. આરામ કરવા માટે વાહનમાંથી ઉતરી તેઓ માર્ગ ઓળંગી રહ્યા હતા. તે જ સમયે પૂરપાટ ઝડપે આવેલા અજાણ્યા વાહન ચાલકે સુધીરકુમારને ટક્કર મારી હતી.
આ ગમખ્વાર અકસ્માતમાં ગંભીર ઇજાઓને કારણે સુધીરકુમારનું ઘટનાસ્થળે જ કરુણ મોત નીપજ્યું હતું. અંકલેશ્વર GIDC પોલીસે આ અંગે ગુનો નોંધી વધુ તપાસ હાથ ધરી છે.
