દક્ષિણ અમેરિકાના દેશ બ્રાઝિલ માંથી એક ચોંકાવનારો કિસ્સો સામે આવ્યો છે. અહીં એક બાળક જ્યારે બુટ પહેરી રહ્યો હતો ત્યારે પગ નાખતા જ તડપવા લાગ્યો હતો. વાસ્તવમાં, જ્યારે બાળક બુટ પહેરી રહ્યો હતો, ત્યારે તેને ખબર નહોતી કે દક્ષિણ અમેરિકાની સૌથી ખતરનાક પ્રજાતિનો એક વીંછી તેની અંદર રાહ જોઇને બેઠો છે. વીંછીના ડંખ બાદ બાળકને એક પછી એક 7 હાર્ટ એટેક આવ્યા અને પછી બાળકનું મોત થયું. બાળકના મોતના સમાચાર ફેલાતા સમગ્ર વિસ્તારમાં સનસનાટી મચી ગઈ છે.
ધ મિરરમાં છપાયેલા અહેવાલ મુજબ બાળકનું નામ બાર્બોસા હતું. તે માત્ર 7 વર્ષનો હતો. બુટમાં બેઠેલા વીંછીના ડંખને કારણે માસૂમનું દર્દનાક મોત થયું હતું. વીંછીએ ડંખ માર્યા બાદ બાળકીને પીડા થવા લાગી ત્યારે માતા-પિતા તેને તાત્કાલિક હોસ્પિટલ લઈ ગયા પરંતુ તેનો જીવ બચી શક્યો નહીં.
બાર્બોસાની માતાએ જણાવ્યું કે તે બ્રાઝિલના સાઓ પાઉલોમાં રહે છે. તેમનો પરિવાર કેમ્પિંગ ટ્રીપ માટે તૈયાર થઈ રહ્યો હતો અને ત્યારે જ આ દુ:ખદ ઘટના બની. તેના બાળકને વીંછીએ ડંખ માર્યો હતો. હોસ્પિટલમાં સારવાર દરમિયાન તેનું મોત નીપજ્યું હતું. મૃત્યુ પહેલા બાળકને 7 વખત હાર્ટ એટેક આવ્યો હતો.