ભરૂચ તાલુકાના ટંકારિયા ગામે કમીશનમાં સારા રૂપિયા મળે છેની લાલચ આપી મિત્રએ જ અન્ય ૩ મિત્રો સાથે છેતર્પીંડી કરતા આખરે મામલો પોલીસ મથકે પહોંચ્યો છે.
ટંકારિયા ગામે અમન કોલોનીમાં રહેતાં યાસીન યુનુસ પટેલ ગામના મેઇન બજારમાં હશનેન કલેકશન નામની રેડીમેડ કપડાની દુકાન ધરાવે છે. વાતરસા ગામે તેના સગાસંબંધીને ત્યાં નાનપણથી અવારનવાર જતો હોઇ ત્યા રહેતાં સલમાન વલી ભગત સાથે તેની મૈત્રી થઇ હતી. દરમિયાન હાલમાં દિવાળીનો તહેવાર ચાલી રહ્યો હોઇ સલમાને યાસીનનો સંપર્ક સાંધ્યો હતો. તેણે જણાવ્યું હતું કે, તે ડિસ્કાઉન્ટમાં ઓનલાઇન મોબાઇલ ખરીદે છે અને તે ભરૂચ-અંક્લેશ્વરની મોબાઇલની દુકાનોમાં તે મોબાઇલ વેચી મોબાઇલ દીઠ 2 હજાર રૂપિયા કમાય છે. તે સેમસંગ મોબાઇલ કેરમાં નોકરી કરતો હોઇ તેના દુકાનોમાં ઓળખાણ હોઇ તે દુકાનો પરથી ઓર્ડર મેળવી મોબાઇલ વેચવાની તેની જવાબદારી રહેશે. તેમ કહીં તેણે રૂપિયા કમાવવાની લાલચ આપી હતી.
દરમિયામાં સલમાને પહેલાં 5મી સપ્ટેમ્બરે બે મોબાઇલનો ઓર્ડર મળ્યો હોવાનું જણાવતાં યાસીને તેના ખાતામાં પહેલાં 62 હજાર ટ્રાન્સ્ફર કર્યાં હતાં. જે બાદ તબક્કાવાર એક – બે મોબાઇલના નવા ઓર્ડર આવ્યાં હોવાનું જણાવી સલમાને તેની પાસેથી કુલ 3.35 લાખ રૂપિયા પોતાના ખાતામાં ટ્રાન્સ્ફર કરાવ્યાં હતાં. અરસામાં યુનુસે તેની પાસે હિસાબ માંગતાં હું અત્યારે અંકલેશ્વર જઇ રહ્યો છું.
ત્યાં હોલસેલરને મોબાઇલ આપી તમારું પેમેન્ટ બપોર બાદ કરી આપીશ તેમ કહી ગયાં બાદ તેનો મોબાઇલ સતત સ્વિચઓફ આવતો હતો. જેના પગલે યાસીન વાતરસા ગામે સલમાનના ઘરે જતાં તે ક્યાંક જતો રહ્યો હોવાનું માલુમ પડ્યું હતું. જે બાદ પણ તપાસ ચાલું રાખતાં સલમાને યાસીનના ગામના જ ઉબયદહ અઝીઝુર રહેમાન ભુટાના 1.75 લાખ, જાવીદ ઉમરજી ગેનના 1.50 લાખ કહાન ગામના જાબીર મહંમદ હકીમના 55 હજાર પણ ખાઇ ગયો હોવાની માલુમ પડ્યું હતું.
બનાવ સંદર્ભે પાલેજ પોલીસે ગુનો નોંધી આગળની કાયદેસરની કાર્યવાહી હાથ ધરી છે. એક તરફ દિવાળીનો તહેવાર ચાલી રહયો છે ત્યારે લોકો ઓનલાઇન ખરીદી કરી રહયાં છે પણ તેમાં છેતરાઇ જવાનો પણ ભય રહેલો હોય કાળજી રાખવી જરૂરી છે.