ભારતના રાષ્ટ્રપતિ શ્રીમતી દ્રૌપદી મુર્મુએ આજે 72 માં રાષ્ટ્રીય ફિલ્મ પુરસ્કારો એનાયત કર્યા અને તમામ પુરસ્કાર વિજેતાઓને તેમની પ્રતિભા, સમર્પણ અને સખત પરિશ્રમ માટે અભિનંદન પાઠવ્યા. તેમણે કહ્યું કે ફિલ્મ નિર્માણ એ એક સહયોગી પ્રયાસ છે અને એવોર્ડ વિજેતાઓને વિનંતી કરી કે તેઓ તેમની ટીમના દરેક સભ્ય સુધી તેમની પ્રશંસા પહોંચાડે જેમના યોગદાનથી એવોર્ડ વિજેતા ફિલ્મો શક્ય બની છે.રાષ્ટ્રપતિએ દાદાસાહેબ ફાળકે પુરસ્કાર પ્રાપ્તકર્તા અનંત નાગને થિયેટર અને સિનેમામાં તેમના વિશિષ્ટ યોગદાન બદલ અભિનંદન પાઠવ્યા.
રાષ્ટ્રપતિએ કહ્યું કે ભારતીય સિનેમા દેશની વિવિધ ભાષાઓ, પરંપરાઓ, આકાંક્ષાઓ અને સંઘર્ષોને પ્રતિબિંબિત કરે છે. તેમણે રાષ્ટ્રીય ફિલ્મ પુરસ્કારોના સ્થળ તરીકે એકતા નગરની પસંદગીની પ્રશંસા કરી, જે ભારતની સાંસ્કૃતિક અને રાષ્ટ્રીય એકતાનું પ્રતીક છે.
સર્જનાત્મક અર્થતંત્રમાં ગૌરવ અને સામાજિક સુરક્ષા માટે આહ્વાન કરતા રાષ્ટ્રપતિએ કહ્યું કે કામદારો, નાના કલાકારો, સહાયકો અને સર્જનાત્મક સમુદાયના સંઘર્ષરત સભ્યો સન્માન અને સામાજિક સુરક્ષાને પાત્ર છે. તેમણે વ્યાપક માનવીય દ્રષ્ટિકોણ સુનિશ્ચિત કરવા માટે તમામ જ્યુરીમાં મહિલાઓની ભાગીદારીનું આહ્વાન પણ કર્યું હતું.
લોકપ્રિય કલાકારોના પ્રભાવને પ્રકાશિત કરતા, ખાસ કરીને બાળકો અને યુવાનો પર, રાષ્ટ્રપતિએ સફળ કલાકારોને શિસ્તબદ્ધ જીવનશૈલીના ફાયદાઓને પ્રોત્સાહન આપવા અને સ્વાસ્થ્ય માટે હાનિકારક પદાર્થોનું સમર્થન કરવાનું ટાળવા માટે વિનંતી કરી.
રાષ્ટ્રપતિએ કહ્યું કે દેશમાં બની રહેલી ફિલ્મોની ગુણવત્તા તેમના વિશ્વાસને મજબૂત કરે છે કે ભારતીય સિનેમા વિશ્વસ્તરીય ધોરણો સ્થાપિત કરી શકે છે.ભારતના રાષ્ટ્રપતિ શ્રીમતી દ્રૌપદી મુર્મુએ શ્રી અનંત નાગને પ્રતિષ્ઠિત દાદાસાહેબ ફાળકે પુરસ્કાર 2024 એનાયત કર્યો, ત્યારે આ ક્ષણે વાર્તા કહેવા, થિયેટર અને સિનેમા પ્રત્યેના તેમના આજીવન સમર્પણની ઉજવણી કરવામાં આવી હતી. આ સન્માને દાયકાઓથી ભારતીય સિનેમામાં તેમના યાદગાર પ્રદર્શન અને કાયમી યોગદાનને માન્યતા આપી.
પોતાના પ્રારંભિક વર્ષોને યાદ કરતા, અનંત નાગે કહ્યું કે તેઓ મુંબઈ મોકલવામાં આવ્યા તે પહેલાં એક આશ્રમમાં ઉછર્યા હતા, જ્યાં તેમને એક નાટકમાં અભિનય કરવાની તક મળી હતી. થિયેટર તેમની કારકિર્દીનો પાયો બન્યું, અને ફિલ્મોમાં પ્રવેશતા પહેલા તેમણે લગભગ 50 નાટકોમાં પ્રદર્શન કર્યું. બાદમાં તેમને પ્રસિદ્ધ ફિલ્મ નિર્માતા શ્યામ બેનેગલ દ્વારા બનાવાયેલી ફિલ્મો સહિતની ફિલ્મોમાં કામ કરવાની તક મળી.
અનંત નાગે કહ્યું કે તેમણે સભાનપણે કન્નડ સિનેમા પસંદ કર્યું અને બેંગલુરુને તેમની કર્મભૂમિ બનાવી. ગયા વર્ષે માનનીય રાષ્ટ્રપતિ દ્વારા તેમને પદ્મ ભૂષણથી સન્માનિત કરવામાં આવ્યા હતા તે યાદ કરીને, તેમણે આ વર્ષે ફરીથી રાષ્ટ્રપતિ તરફથી દાદાસાહેબ ફાળકે પુરસ્કાર મેળવવા બદલ ઊંડી કૃતજ્ઞતા વ્યક્ત કરી હતી.
ગુજરાતમાં આ સમારોહે રાષ્ટ્રીય ફિલ્મ પુરસ્કારોની સફરમાં એક નવો અધ્યાય અંકિત કર્યો.
ગુજરાતના રાજ્યપાલ આચાર્ય દેવવ્રતે દિલ્હી બહાર રાષ્ટ્રીય ફિલ્મ પુરસ્કારો યોજવાની પરંપરા શરૂ કરવા બદલ માહિતી અને પ્રસારણ મંત્રાલયનો આભાર વ્યક્ત કર્યો હતો, અને કહ્યું હતું કે સરદાર વલ્લભભાઈ પટેલના વારસા અને શક્તિ સાથે જોડાયેલા એકતા નગર, કેવડિયા ખાતે આ પ્રતિષ્ઠિત પુરસ્કારોનું આયોજન કરવું એ ગુજરાત માટે ગૌરવની વાત છે.72માં રાષ્ટ્રીય ફિલ્મ પુરસ્કાર સમારોહને સંબોધતા રાજ્યપાલે જણાવ્યું હતું કે ભારતીય સિનેમાએ દેશની વિવિધ ભાષાઓ અને સંસ્કૃતિઓને સમૃદ્ધ બનાવવામાં નોંધપાત્ર યોગદાન આપ્યું છે.
તેમણે ફિલ્મ નિર્માતાઓને પ્રાકૃતિક ખેતી, તંદુરસ્ત જીવનશૈલી અને પર્યાવરણીય જાગૃતિને પ્રોત્સાહન આપવા માટે અને પ્રેમ, ભાઈચારો અને રાષ્ટ્રીય એકતાના મૂલ્યોને મજબૂત કરવા સિનેમાનો ઉપયોગ કરવા વિનંતી કરી.ગુજરાતના મુખ્યમંત્રી ભૂપેન્દ્ર પટેલે 72માં રાષ્ટ્રીય ફિલ્મ પુરસ્કારો માટે માનનીય રાષ્ટ્રપતિ અને પ્રતિષ્ઠિત મહેમાનોનું ગુજરાતમાં સ્વાગત કર્યું હતું, અને એકતા નગર ખાતે સમારોહના આયોજનને રાજ્ય માટે ગૌરવની બાબત ગણાવી હતી.
તેમણે સિનેમાને સમાજનું પ્રતિબિંબ, સંસ્કૃતિનું વાહક અને માનવ લાગણીઓને જોડવાનું એક શક્તિશાળી માધ્યમ ગણાવ્યું હતું, જેમાં ભારતની વૈશ્વિક ઓળખ અને સોફ્ટ પાવરને મજબૂત કરવાની ક્ષમતા છે.
ગુજરાતના સમૃદ્ધ વારસા, વિવિધ લેન્ડસ્કેપ્સ અને સાંસ્કૃતિક પરંપરાઓને પ્રકાશિત કરતા, તેમણે ભારતીય અને આંતરરાષ્ટ્રીય ફિલ્મ નિર્માતાઓને શૂટિંગ માટે ગુજરાત પસંદ કરવા આમંત્રણ આપ્યું હતું અને આ પ્રતિષ્ઠિત સમારોહને રાજ્યમાં લાવવા બદલ માહિતી અને પ્રસારણ મંત્રાલયનો આભાર માન્યો હતો.
કેન્દ્રીય માહિતી અને પ્રસારણ મંત્રી અશ્વિની વૈષ્ણવે એકતા નગર, કેવડિયા ખાતે 72માં રાષ્ટ્રીય ફિલ્મ પુરસ્કાર સમારોહની શોભા વધારવા બદલ માનનીય રાષ્ટ્રપતિનો આભાર વ્યક્ત કર્યો હતો અને ભારતીય સિનેમામાં તેમની ઉત્કૃષ્ટ સિદ્ધિઓ બદલ તમામ એવોર્ડ વિજેતાઓને અભિનંદન પાઠવ્યા હતા.
મંત્રીએ કહ્યું કે સિનેમા એ ટીમ પ્રયાસ છે અને રાષ્ટ્રીય ફિલ્મ પુરસ્કારો એવોર્ડ મેળવનારા અને પડદા પાછળ કામ કરનારા બંનેની કદર કરે છે. તેમણે ભારતીય સિનેમામાં તેમના અપ્રતિમ યોગદાન બદલ દાદાસાહેબ ફાળકે પુરસ્કાર પ્રાપ્તકર્તા અનંત નાગની પણ પ્રશંસા કરી હતી.
અશ્વિની વૈષ્ણવે જણાવ્યું હતું કે રાષ્ટ્રીય ફિલ્મ પુરસ્કારોનો હેતુ રાજ્યો અને કેન્દ્રશાસિત પ્રદેશોના મહત્વના પ્રવાસન સ્થળોએ સમારોહને લઈ જવાનો છે, જેથી ભારતની સમૃદ્ધ સાંસ્કૃતિક વિરાસત અને પ્રવાસનને પ્રોત્સાહન મળી શકે. તેમણે રાજ્યો અને કેન્દ્રશાસિત પ્રદેશોને રાષ્ટ્રીય ફિલ્મ પુરસ્કારોની ભવિષ્યની આવૃત્તિઓ માટેના સ્થળો તરીકે પ્રવાસન સ્થળોની પીચ કરવા આહ્વાન કર્યું હતું.
ઇન્ડિયન ઇન્સ્ટિટ્યૂટ ઓફ ક્રિએટિવ ટેકનોલોજીસ (IICT) ને એક નવા ટેલેન્ટ પુલ તરીકે રેખાંકિત કરતા, તેમણે કહ્યું કે 13 અભ્યાસક્રમોમાં લગભગ 380 વિદ્યાર્થીઓ પહેલાથી જ નોંધાયેલા છે, જેનો અભ્યાસક્રમ ઉદ્યોગ દ્વારા ડિઝાઇન અને સંચાલિત થાય છે. તેમણે વધુમાં માહિતી આપી હતી કે માનનીય પ્રધાનમંત્રીએ દેશભરમાં 15,000 ક્રિએટિવ લેબ્સને મંજૂરી આપી છે, જે યુવાનો માટે ઉભરતી ટેકનોલોજી શીખવા અને ભારતની વિવિધ સંસ્કૃતિને પ્રદર્શિત કરવાની નવી તકો ઊભી કરે છે.
મંત્રીએ ફિલ્મ નિર્માતાઓ અને સમગ્ર ફિલ્મ બિરાદરીને, પ્રસાર ભારતીના અધ્યક્ષ તરીકે પ્રસુન જોશી સાથે, નાના શહેરોમાંથી કાચી પ્રતિભાને ઓળખવા, પોષવા અને પ્રોત્સાહિત કરવામાં મદદ કરવા આહ્વાન કર્યું હતું.તેમણે પુનરોચ્ચાર કર્યો હતો કે સરકાર અને સર્જનાત્મક બિરાદરીના સંયુક્ત પ્રયાસો ભારતની અપાર સર્જનાત્મક ક્ષમતાને અનલોક કરવામાં અને ભારતીય પ્રતિભાને વિશ્વભરના પ્રેક્ષકો સુધી પહોંચાડવામાં મદદ કરી શકે છે.તેમણે આવતા વર્ષે ઓક્ટોબરમાં યોજાનાર WAVES 2027 માટે સૂચનો અને વિચારો પણ આમંત્રિત કર્યા હતા.
માહિતી અને પ્રસારણ મંત્રાલયના સચિવ ચંચલ કુમારે જણાવ્યું હતું કે 72મા રાષ્ટ્રીય ફિલ્મ પુરસ્કારોમાં, 34 ભાષાઓમાં 400 ફીચર ફિલ્મો અને 24 ભાષાઓમાં 161 નોન-ફીચર ફિલ્મો પ્રાપ્ત થઈ હતી, જેમાં 22 ફીચર ફિલ્મ અને 23 નોન-ફીચર ફિલ્મ પુરસ્કારો એનાયત કરવામાં આવ્યા હતા. તેમણે કહ્યું કે ભારતીય સિનેમા સાંસ્કૃતિક અભિવ્યક્તિ અને વૈશ્વિક વાર્તા કહેવાના એક શક્તિશાળી માધ્યમ તરીકે સતત વધી રહ્યું છે.
સચિવે જણાવ્યું હતું કે દિલ્હી બહાર એકતા નગર ખાતે રાષ્ટ્રીય ફિલ્મ પુરસ્કારોનું આયોજન કરવું એ સરદાર વલ્લભભાઈ પટેલના વિઝન અને રાષ્ટ્રીય એકતા પ્રત્યેની પ્રતિબદ્ધતાથી પ્રેરિત એક મહત્વપૂર્ણ પહેલ છે, અને આવનારા વર્ષોમાં આ સમારોહ અન્ય શહેરોમાં પણ યોજવાની કલ્પના કરવામાં આવી છે.લીડિંગ રોલમાં શ્રેષ્ઠ અભિનેતાનો એવોર્ડ મામૂટી (ભ્રમયુગમ માટે) અને કાર્તિક આર્યન (ચંદુ ચેમ્પિયન માટે) વચ્ચે સંયુક્ત રીતે આપવામાં આવ્યો હતો, જ્યારે યામી ગૌતમને આર્ટિકલ 370 માટે લીડિંગ રોલમાં શ્રેષ્ઠ અભિનેત્રીનો એવોર્ડ મળ્યો હતો.સહાયક શ્રેણીઓમાં, સંજય મિશ્રાને ભક્ષક માટે શ્રેષ્ઠ સહાયક અભિનેતા તરીકે સન્માનિત કરવામાં આવ્યા હતા, જ્યારે સાચના નમિદાસ (મહારાજા માટે) અને રૂપશ્રી વર્કાડી (મિથ્યા માટે) ને શ્રેષ્ઠ સહાયક અભિનેત્રીનો એવોર્ડ સંયુક્ત રીતે મળ્યો હતો.આર્ટિકલ 370 ને શ્રેષ્ઠ ફીચર ફિલ્મ તરીકે સન્માનિત કરવામાં આવી હતી, જ્યારે રણદીપ હુડાને તેમના નિર્દેશન ડેબ્યૂ, સ્વાતંત્ર્ય વીર સાવરકર માટે માન્યતા મળી હતી. કલ્કી 2898 AD ને શ્રેષ્ઠ લોકપ્રિય મનોરંજક ફિલ્મ (Best Popular Film Providing Wholesome Entertainment) તરીકે નામાંકિત કરવામાં આવી હતી,
જ્યારે કૅપ્ટન મિલરને રાષ્ટ્રીય, સામાજિક અને પર્યાવરણીય મૂલ્યોને પ્રોત્સાહન આપતી શ્રેષ્ઠ ફીચર ફિલ્મનો એવોર્ડ મળ્યો હતો. રાજકુમાર પરિયાસામીને અમરન માટે શ્રેષ્ઠ નિર્દેશનનો એવોર્ડ મળ્યો હતો.પુરસ્કારોએ ભારતીય સિનેમાની ભાષાકીય વિવિધતાને પણ રેખાંકિત કરી. બંધારણની આઠમી અનુસૂચિમાં નિર્દિષ્ટ ભાષાઓ ઉપરાંત, ગઢવાલી અને તુલુ સિનેમાને પણ રાષ્ટ્રીય માન્યતા મળી.SC ફાર્માકેમ પ્રાઇવેટ લિમિટેડ દ્વારા નિર્મિત અને દિનેશ પી. ભોંસલે દ્વારા નિર્દેશિત ઢોલી (Dholi) ને શ્રેષ્ઠ ગઢવાલી ફિલ્મનો એવોર્ડ મળ્યો, જ્યારે પિચ્ચર સ્ટુડિયો દ્વારા નિર્મિત અને શિવધ્વજ શેટ્ટી દ્વારા નિર્દેશિત IMBU ને શ્રેષ્ઠ તુલુ ફિલ્મ તરીકે સન્માનિત કરવામાં આવી.
