અંકલેશ્વર-વાલિયા રોડ પર ચાલી રહેલા માર્ગકામ દરમિયાન ગુજરાત ગેસની પાઇપલાઇનમાં ભંગાણ સર્જાતાં અચાનક પ્રેશર સાથે ગેસ બહાર નીકળવા લાગ્યો હતો. ગેસના જોરદાર લીકેજના દૃશ્યો સામે આવતાં જ આસપાસના વિસ્તારમાં ચિંતાનો માહોલ ફેલાયો હતો. માર્ગકામ દરમિયાન ગેસની પાઇપલાઇનને નુકસાન પહોંચવાની આ ઘટનાએ બાંધકામ કામગીરીમાં સાવચેતી અને સુરક્ષાનાં પગલાં અંગે સવાલો ઊભા કર્યા છે.
ઘટનાની જાણ થતાં જ ડી.પી.એમ.સી.ના ફાયર ફાયટરો તાત્કાલિક ઘટનાસ્થળે દોડી આવ્યા હતા. ફાયર વિભાગની ટીમે જરૂરી સુરક્ષાત્મક કામગીરી હાથ ધરી પરિસ્થિતિને નિયંત્રણમાં લીધી હતી. બીજી તરફ ગુજરાત ગેસ કંપનીના અધિકારીઓ પણ ઘટનાસ્થળે પહોંચ્યા હતા અને ગેસ લીકેજને અટકાવવા માટે જરૂરી કાર્યવાહી હાથ ધરી હતી.
ગેસ પાઇપલાઇનમાં ભંગાણ થતાં માર્ગ પર વાહનવ્યવહારને પણ અસર પહોંચી હતી. ગેસ પ્રેશર સાથે બહાર નીકળતો હોવાના કારણે આસપાસના લોકોમાં ગભરાટ ફેલાયો હતો. સદનસીબે તાત્કાલિક કાર્યવાહીથી પરિસ્થિતિ કાબૂમાં આવી હતી. જોકે, આ ઘટનાએ માર્ગકામ દરમિયાન જમીનની અંદરથી પસાર થતી ગેસ પાઇપલાઇન સહિતની મહત્વપૂર્ણ સેવાઓની સુરક્ષા અંગે ગંભીર સવાલો ઊભા કર્યા છે.
શું માર્ગકામ શરૂ કરતાં પહેલાં સંબંધિત વિભાગો પાસેથી ભૂગર્ભ પાઇપલાઇનની સંપૂર્ણ વિગતો મેળવવામાં આવી હતી? શું કામદારોને જરૂરી માર્ગદર્શન અને સુરક્ષાત્મક સૂચનાઓ આપવામાં આવી હતી? જો સમયસર ગેસ લીકેજની જાણ ન થઈ હોત તો મોટી દુર્ઘટના સર્જાવાની શક્યતા નકારી શકાય તેમ નહોતી. હવે સંબંધિત તંત્રએ આ ઘટનાની તપાસ કરી પાઇપલાઇનમાં ભંગાણ થવા પાછળનું ચોક્કસ કારણ બહાર લાવવું જરૂરી બન્યું છે, જેથી ભવિષ્યમાં આવી જોખમી ઘટનાઓનું પુનરાવર્તન અટકાવી શકાય.
