ધોધમાર વરસાદ વરસતા આમોદમાં વડાપ્રધાનના આગમન પહેલાં સભામંડપ સહિત આસપાસ પાણી ભરાતા વહીવટીતંત્ર દ્વારા કપચી,મેટલ,તથા ડસ્ટ પાથરી સભાસ્થળને સમથળ કરવાની કામગીરી યુદ્ધના ધોરણે ચાલી રહી છે.

જંબુસર તાલુકા ટંકારી બંદર સહિત ના પાંચ ગામોની ૨૦૦૦ એકર જેટલી જમીન ઉપર નિર્માણ થનાર ભારતના પ્રથમ બલ્ક ડ્રગ પાર્કના ખાતમુહૂર્ત માટે આમોદ ખાતે આગામી ૧૦ મી ઓક્ટોમ્બરને સોમવારે વડાપ્રધાન નરેન્દ્ર મોદી આવવાના હોય વહીવટી તંત્ર દ્વારા તડામાર તૈયારીઓ કરવામાં આવી રહી છે.ત્યારે ગત રોજ બપોર બાદ આમોદમાં ધોધમાર વરસાદ વરસતા વડાપ્રધાન માટે બનાવેલા સભામંડપની આસપાસ વરસાદી પાણી ભરાઈ ગયા હતા.આ ઉપરાંત તૈયારીઓના ભાગ રૂપે કામ કરતાં મજૂરોના મંડપ પણ ધોધમાર વરસાદ અને ભારે પવનને કારણે ઉડી ગયા હતા.

જેથી વડાપ્રધાનના આગમનની તૈયારી કરતાં તંત્રમાં દોડધામ મચી જવા પામી હતી.તેમજ સભામંડપ સહિત પાર્કિંગ વ્યવસ્થામાં પણ વરસાદી પાણી ભરાઈ ગયા હતા.આ ઉપરાંત વડાપ્રધાનની સભા માટે બંદોબસ્તમાં આવેલા અનેક પોલીસ જવાનો ના વાહનો પણ વરસાદને કારણે કાદવમાં ફસાઈ ગયા હતાં.અત્રે ઉલ્લેખનીય છે કે વડાપ્રધાન ની જાહેર સભા માટે તંત્ર દ્વારા તડામાર તૈયારીઓ કરવામાં આવી રહી છે પરંતુ વરસાદ વરસતા તંત્ર ની તૈયારીઓ ઉપર જાણે પાણી ફરી વળ્યું હોય તેમ લાગી રહ્યું હતુ.

1 of 8

આજે સવાર થી જ વડાપ્રધાન નરેન્દ્રભાઈ મોદીના સભાસ્થળે પરિસ્થિતી યથાવત કરવા વહીવટીતંત્ર ધ્વારા યુધ્ધના ધોરણે કામગીરી હાથ ધરી હતી.સભા સ્થળે ભરાયેલ પાણીના નિકાલ માટે કામગીરી હાથ ધરી સભા મંડપની આજુબાજુની જગ્યા વ્યવસ્થિત કરવા સેંકડો જેસીબી મશીન તેમજ મજૂરોને કામે લગાડયા છે.તેમજ એક હજાર થી વધુ ગાડી મેટલ,કપચી,ડસ્ટ પાથરી યથાવત સ્થિતી કરવાની કામગીરી હાથ ધરવામા આવી છે.

અત્રે ઉલ્લેખનીય છે કે આજે બપોરે પાર્કિંગ સ્થળની જિલ્લા કલેકટર તુષાર સુમેરા જિલ્લા પોલીસ વડા ડૉ.લીના પાટીલ,નાયબ કલેકટર ભરૂચના ધારાસભ્ય દુષ્યંતભાઈ પટેલ, જિલ્લા ભાજપ પ્રમુખ મારૂતિસિંહ અટોદરિયા,ભરૂચ જિલ્લા સાસંદ મનસુખભાઇ વસાવાએ તેમજ આમોદ તાલુકા ભાજપના સ્થાનિક આગેવાનોએ સ્થળ મુલાકાત લીધી હતી. જેમાં પાર્કિંગ વ્યવસ્થા બદલવા અંગે ચર્ચા વિચારણા કરી હતી.

* રિપોર્ટર:વિનોદ પરમાર,ન્યુઝલાઇન,આમોદ