ભરૂચ જિલ્લાના વાલીયા તાલુકાના લુણા ગામે આજે યોજાયેલી ગ્રામસભામાં ગુજરાત મિનરલ ડેવલપમેન્ટ કોર્પોરેશન (GMDC) ના વાલીયા લિગ્નાઇટ પ્રોજેક્ટ સામે ગ્રામજનોએ આક્રોશ વ્યક્ત કર્યો હતો. પ્રોજેક્ટ માટે ગેરમાર્ગે દોરનારી માહિતી આપીને પર્યાવરણ મંજૂરી (Environmental Clearance – EC) મેળવવામાં આવી હોવાના આક્ષેપો સાથે, આ મંજૂરી રદ કરવા અને નેશનલ ગ્રીન ટ્રિબ્યુનલ (NGT) તથા ગુજરાત હાઇકોર્ટમાં કાનૂની લડત આપવા અંગે ગ્રામસભામાં સર્વાનુમતે ઠરાવ પસાર કરવામાં આવ્યો છે.
ગ્રામસભામાં વાલીયા લિગ્નાઇટ પ્રોજેક્ટની પર્યાવરણીય અસરો અને તેની મંજૂરી પ્રક્રિયા અંગે ગંભીર ચર્ચા કરવામાં આવી હતી. ગ્રામજનોનો આક્ષેપ છે કે GMDC દ્વારા EC મેળવતી વખતે મહત્વપૂર્ણ હકીકતો છુપાવવામાં આવી છે અને ખોટા તથ્યો રજૂ કરાયા છે. આ સમગ્ર મામલે નિષ્પક્ષ તપાસની માંગ સાથે, સંબંધિત સત્તાધિકારીઓ સમક્ષ રજૂઆત કરવા અને જરૂર પડ્યે NGT તેમજ ગુજરાત હાઇકોર્ટમાં પિટિશન દાખલ કરવાનો નિર્ણય લેવાયો છે.
આ મહત્વપૂર્ણ ગ્રામસભામાં લુણા ગામનાં સરપંચ શ્રીમતી ભદ્રિકાબેન વસાવા, કોંગ્રેસ અગ્રણી અને પૂર્વ સરપંચ વિજયભાઈ વસાવા તેમજ ગુજરાત પ્રદેશ કોંગ્રેસ સમિતિના મહામંત્રી સંદીપ માંગરોલા ખાસ હાજર રહ્યા હતા. ઉપસ્થિત આગેવાનોએ ગ્રામજનોને આ પ્રોજેક્ટની કાયદાકીય અને પર્યાવરણીય જોગવાઈઓ અંગે વિગતવાર માર્ગદર્શન આપ્યું હતું.
•“આ પ્રશ્ન સીધો ગામના લોકોના હિત, પર્યાવરણના સંરક્ષણ અને આવનારી પેઢીના ભવિષ્ય સાથે જોડાયેલો છે. ગ્રામજનોનો અવાજ લોકશાહી ઢબે અને કાયદાકીય માધ્યમથી મજબૂતીથી રજૂ થવો અત્યંત જરૂરી છે.”
— સંદીપ માંગરોલા, મહામંત્રી, ગુજરાત પ્રદેશ કોંગ્રેસ સમિતિ
ગ્રામસભામાં પસાર થયેલા ઠરાવોના આધારે હવે લુણા ગ્રામ પંચાયત અને ગ્રામજનો દ્વારા પર્યાવરણ મંજૂરી રદ કરાવવા માટે કાયદાકીય દસ્તાવેજો તૈયાર કરી NGT અને ગુજરાત હાઇકોર્ટમાં અરજી કરવાની કાર્યવાહી હાથ ધરવામાં આવશે. અંતમાં, ગ્રામજનોએ પોતાના હિતો અને પર્યાવરણના રક્ષણ માટે એકજૂથ થઈને કાયદાકીય લડત લડવાનો મક્કમ સંકલ્પ વ્યક્ત કર્યો હતો.






