ભરૂચ જિલ્લાના અંકલેશ્વર અને હાંસોટ પંથકમાં ખરીફ મોસમની લણણી પૂર્ણ થયા બાદ હવે ખેડૂતો પોતાના પાકને બજારમાં વેચવા માટે તૈયાર કરી રહ્યા છે. આ વર્ષે બજારમાં ડાંગરના ભાવમાં વધારો જોવા મળ્યો છે, જે ખેડૂતો માટે રાહતના સમાચાર છે. પરંતુ સામે પક્ષે પ્રતિકૂળ હવામાનને કારણે ઉત્પાદનમાં નોંધપાત્ર ઘટાડો નોંધાયો છે. આ પરિસ્થિતિ વચ્ચે, પાકના પૂરેપૂરા વળતર મેળવવા માટે ખેડૂતો અત્યારે ડાંગરમાંથી ભેજ દૂર કરવાની કવાયતમાં લાગ્યા છે.
ખરીફ મોસમ બાદ લણાયેલી ડાંગરમાં ભેજનું પ્રમાણ વધારે હોવાથી તેને સીધી બજારમાં વેચી શકાતી નથી. જો ભેજવાળો પાક વેચવામાં આવે તો બજારમાં ધારેલો ભાવ મળતો નથી. આથી, ડાંગરને યોગ્ય રીતે સૂકવવા માટે અંકલેશ્વર અને હાંસોટ પંથકના ખેડૂતો દ્વારા મુખ્ય માર્ગોનો ઉપયોગ કરવામાં આવી રહ્યો છે. ખાસ કરીને હાંસોટના રોહિદથી પંડવાઈ વચ્ચેના અંદાજે 8થી 10 કિલોમીટર લાંબા રસ્તા પર ખેડૂતોએ ડાંગર પાથરીને તડકામાં સૂકવવાનું શરૂ કર્યું છે. રસ્તા પરથી પસાર થતા વાહનોની અવરજવર વચ્ચે પણ ખેડૂતો મજબૂરીવશ આ જોખમી કવાયત કરી રહ્યા છે જેથી પાક સડતો અટકે અને બજારમાં યોગ્ય ભાવ મેળવી શકાય.
ચાલુ વર્ષે ડાંગરના બજાર ભાવ ગત વર્ષની સરખામણીએ સારા મળી રહ્યા છે, પરંતુ ખેડૂતોના ચહેરા પર સંપૂર્ણ ખુશી નથી. ચોમાસા દરમિયાન અનિયમિત વરસાદ અને પાછળથી રોગચાળાના ઉપદ્રવને કારણે ડાંગરના એકંદર ઉત્પાદનમાં મોટો ઘટાડો થયો છે. એક તરફ ઉત્પાદન ઘટતા એકર દીઠ આવક ઓછી થઈ છે, ત્યારે બીજી તરફ બચેલા પાકમાંથી એક-એક રૂપિયો વસૂલવા માટે ખેડૂતો રાત-દિવસ એક કરી રહ્યા છે. રસ્તાઓ પર ડાંગર સૂકવવાની આ મથામણ ખેડૂતોની આર્થિક કટોકટી અને પાકને બચાવવાની મજબૂરી દર્શાવે છે.
