ભરૂચ લોકલ ક્રાઈમ બ્રાન્ચ (LCB) ની ટીમે નેત્રંગ તાલુકાના કાંટીપાડા ગામમાં પ્રોહિબિશન રેડ કરીને એક ઘરમાંથી લાખો રૂપિયાની કિંમતનો વિદેશી દારૂનો જથ્થો ઝડપી પાડવામાં મોટી સફળતા મેળવી છે. પોલીસે સ્થળ પરથી રૂપિયા 3.16 લાખથી વધુની કિંમતનો દારૂ અને બિયરનો જથ્થો જપ્ત કર્યો છે, જ્યારે રેડ દરમિયાન નાસી છૂટેલા બે સ્થાનિક બુટલેગરોને વોન્ટેડ જાહેર કરી આગળની કાયદેસરની કાર્યવાહી હાથ ધરી છે.
મળતી માહિતી મુજબ, ભરૂચ LCBની ટીમ આગામી દિવસોને ધ્યાનમાં રાખીને ગત 24 તારીખના રોજ નેત્રંગ વિસ્તારમાં સઘન પેટ્રોલિંગ કરી રહી હતી. આ દરમિયાન પોલીસ ટીમને ચોક્કસ ખાનગી બાતમીદારથી માહિતી મળી હતી કે, કાંટીપાડા ગામના નિશાળ ફળિયામાં રહેતો દીપક ઇન્દુ વસાવા મોટા પાયે વિદેશી દારૂનો ગેરકાયદેસર વેપાર કરે છે. તે દારૂનો આ જથ્થો પોતાના તેમજ આસપાસના મકાનોમાં સંતાડીને છૂટક વેચાણ નેટવર્ક ચલાવી રહ્યો છે.
ચોક્કસ બાતમીના આધારે LCBની ટીમે મોડી રાત્રે કાંટીપાડા ગામના નિશાળ ફળિયામાં ત્રાટકીને દીપક વસાવાના ઘર તેમજ આસપાસના વિસ્તારોમાં સર્ચ ઓપરેશન હાથ ધર્યું હતું. આ તપાસ દરમિયાન દીપકના ઘરની નજીક જ આવેલા રિતેશ ભગુ વસાવાના મકાનમાંથી વિદેશી દારૂ અને બિયરનો મોટો જથ્થો મળી આવ્યો હતો. પોલીસે ઘટનાસ્થળેથી કુલ 1,858 નંગ વિદેશી દારૂની બોટલો તેમજ બિયરના ટીન જપ્ત કર્યા હતા, જેની અંદાજિત કિંમત ₹3,16,574 આંકવામાં આવી છે.
પોલીસના દરોડાની ભીંસ વધતા જ બંને આરોપીઓ પોલીસને થાપ આપીને ભાગી છૂટવામાં સફળ રહ્યા હતા. પોલીસે આ મામલે નીચે મુજબના આરોપીઓ સામે ગુનો નોંધ્યો છે:
• દીપક ઇન્દુ વસાવા (રહે. કાંટીપાડા, તા. નેત્રંગ) – મુખ્ય સૂત્રધાર
• રિતેશ ભગુ વસાવા (રહે. કાંટીપાડા, તા. નેત્રંગ) – દારૂ સંતાડવા માટે ઘર આપનાર
આ સમગ્ર મામલે ભરૂચ LCB દ્વારા નેત્રંગ પોલીસ સ્ટેશનમાં પ્રોહિબિશન એક્ટની વિવિધ કલમો હેઠળ ગુનો નોંધીને ફરાર થઈ ગયેલા બંને બુટલેગરોને ઝડપી પાડવા માટે ચક્રો ગતિમાન કર્યા છે.
