એક માર્ગ પરથી બીજા માર્ગ અને હોસ્ટેલ ગ્રાઉન્ડ પર ગંદકીનો ખડકલો કરતી પાલિકાની કામગીરી સામે ઉઠતાં સવાલો
ભરૂચના હાર્દસમા વિસ્તારની 40 વર્ષ જૂની વરસાદી પાણી ભરાવાની સમસ્યા ઉકેલવા ₹2.95 કરોડના ખર્ચે 900 મીટરનો પેવર બ્લોક રોડ બનાવવા હાલ કામગીરી ચાલી રહી છે.જોકે પાલિકાના અણઘડ આયોજનનો ભોગ આ વિસ્તારના વેપારીઓ, દુકાનદાર અને વાહનચાલકો તેમજ સીનીયર સિટીઝન બની રહ્યાં છે.પાલિકા દ્વારા ગટરોનો કચરો ઠલવતા અતિશય દુર્ગન્ધના પગલે પ્રજા ત્રાહિમામ પોકારી ઉઠી છે.
ભરૂચમાં ડ્રેનેજ લાઈન માટે દિવસો સુધી રસ્તાની એક બાજુ ખોદી કાઢ્યા બાદ હવે વર્ષો જૂની પાંચબત્તી-સેવાશ્રમ માર્ગની ડ્રેનેજોની સફાઈ કામગીરી કરાઈ રહી છે.ડ્રેનેજોમાંથી ગંદકી કાઢી તેના થર પાનમ પ્લાઝાથી સિટી સર્વે જવા વાળા માર્ગ પર તથા હોસ્ટેલ ગ્રાઉન્ડ પર નાખી દેવાયા છે. હવે આના લીધે આ માર્ગ પરથી પસાર થતા વાહનચાલકો અને રાહદારીઓ તેમજ હોસ્ટેલ ઉપર ચાલવા અને રમવા આવતા લોકોને અતિશય દુર્ગન્ધનો સામનો કરવો પડવા સાથે રોગચાળો ફાટી નીકળવાની દહેશત સેવાઈ રહી છે.
