ભરૂચની દિલ્હી પબ્લિક સ્કૂલનો આર્ટ અને ડાન્સ શિક્ષક ધોરણ 5, 6 અને 7 માની વિધાર્થિનીઓ સાથે શારીરિક અડપલાં કરતો હોવાની અને શિક્ષણ જગતને શમશાર કરતી ઘટના સામે આવી છે.
અલકનંદા સોસાયટીમાં રહેતો 33 વર્ષીય ધ્રુવીલકુમાર બાબુભાઇ પટેલ DPS શાળામાં બાળકોને ડાન્સ અને આર્ટ્સ શીખવતો હતો. જોકે શિક્ષણ જગતને લજાવનાર આ લંપટ અપરણિત શિક્ષક છાત્રાઓને શારીરિક અડપલાં કરતો હતો.
ભરૂચ જિલ્લામાં આવેલ એક મોટા ઉધોગગૃહમાં કામ કરતા ઉચ્ચ અધિકારીની 7 માં ધોરણમાં અભ્યાસ કરતી દીકરી સાથે આ શિક્ષક જાતીય સતામણી કરતો હોવાનું માલુમ પડતા તેઓ સમસમી ઉઠ્યા હતા.DPS સ્કૂલમાં આ ઉચ્ચ અધિકારીએ વાલી તરીકે ફરિયાદ કરતા સંચાલકોએ પોતાની સ્કૂલની પ્રતિષ્ઠા સાચવવા તેનું માફીનામું લખાવી શાળામાંથી હકાલપટ્ટી કરી દીધી હતી.
એક જાગૃત વાલી તરીકે આવા સમાજ અને દીકરીઓ માટે ઘાતક શિક્ષકને પાઠ ભણાવવા તેઓએ સી ડિવિઝન પોલીસ મથકે ફરિયાદ નોંધાવી છે. સમગ્ર શેક્ષણિક અલમમાં દાખલો બેસાડવા અને અન્ય વાલીઓ પણ આવા પાશવી તત્વોને ખુલ્લા પાડે તેવા આશયથી ઉચ્ચ અધિકારીએ તેમની દીકરી સાથે થયેલી છેડછાડ અન્ય કોઈની દીકરી સાથે ન થાય તે માટે પોલીસ ફરિયાદ દાખલ કરાવી છે.સી ડિવિઝન PI હસમુખ ગોહિલે પણ ત્વરિત કાર્યવાહી કરી લંપટ શિક્ષક ધ્રુવીલ પટેલની પોકસો એક્ટ હેઠળ ધરપકડ કરી લીધી છે. આ શિક્ષકના મોબાઇલમાંથી અન્ય છાત્રાઓના પણ અશ્લીલ ફોટા અને કેટલાક પોર્ન વિડીયો મળી આવ્યા છે.