ભરૂચના પરિવારને 7વર્ષથી નકલી ફેસબુક આઈડી દ્વારા પરેશાન કરતા શખ્શને ભરૂચ જીલ્લા સાયબર ક્રાઇમ પોલીસે ઝડપી પાડી લોકઅપ ભેગો કરી દીધો છે.
ભરૂચ જીલ્લા પોલીસ અધિક્ષક ડો. લીના પાટીલ તથા નાયબ પોલીસ અધિક્ષક સી કે પટેલ ભરૂચ ડીવીઝન ભરૂચ તરફથી આ ગુનાને શોધી કાઢવા માર્ગદર્શન તથા સુચના આપવામાં આવી હતી.
ભરૂચ જીલ્લામાં બનતા સાયબર ક્રાઇમને લગતા બનાવોમાં ભોગ બનનારને તાત્કાલીક મદદરૂપ થવા ભરૂચ જીલ્લા સાયબર ક્રાઇમ પોલીસ મથકના પોલીસ ઇન્સ્પેક્ટર બી.એલ.મહેરીયાએ આ સંવેદનશીલ ગુના તરફ વધુ ધ્યાન કેન્દ્રિત કરાવ્યું હતું. સાયબર ક્રાઈમ પોલીસે ગુનો નોંધી આગળની તપાસ હાથ ધરવામાં આવી હતી. પરિવારના સભ્યોના બિભત્સ ફોટો બનાવી સોશીયલ મીડીયા પર વાયરલ કરવાના આ અગાઉ ગુના જંબુસર અને ભરૂચ શહેર સી ડિવિઝન પોલીસ સ્ટેશનમાં પણ નોંધાયા હતા.
ફેક ફેસબુક એકાઉન્ટ બનાવી ફેસબુક સાઇટ ઉપર ફરીયાદી તથા ફરીયાદીના પરિવારના સભ્યોનાં ફોટાઓ મેળવી તેમાં એડીટીંગ કરી અશ્લીલ ફોટાઓ બનાવી ફેસબુક એકાઉન્ટની ટાઇમલાઇન ઉપર અપલોડ કરવામાં આવી રહ્યા હતા. સાઇબર ક્રાઇમ પોલીસે એક્શન લઇ ટેકનીકલ એનાલીસીસ સાથે હ્યુમન ઇન્ટેલીજન્સના આધારે આરોપીને શોધી કાઢી મોટારેહા ગામ- ભુજ ખાતેથી ધરપકડ કરી સાયબર ક્રાઇમ પોલીસ સ્ટેશનનો ગુનો શોધી કાઢવામાં આવેલ છે.
ધરપકડ કરાયેલો આરોપી સતુભા સોમુભા માધુભા જાડેજા ઉ.વ. 35, રહે- વંડી ફળીયુ, મોટા રેહા, તા.ભુજ જી.કચ્છ નું ફરિયાદીની પત્ની સાથે સગપણ તૂટી ગયું હતું જે બાદ બદલો લેવા તે છેલ્લા 7 વર્ષથી આ કૃત્ય કરી રહ્યો હતો જેને ભરૂચ પોલીસે ઝડપી પાડ્યો છે.