ભરૂચ શહેરમાં ડ્રગ્સ સહિતના માદક પદાર્થોના ગેરકાયદે કારોબાર સામે કાર્યવાહી કરતાં બી ડિવિઝન પોલીસે 76 ગ્રામ MD ડ્રગ્સના જથ્થા સાથે 23 વર્ષીય યુવકને ઝડપી પાડ્યો છે. ત્રણકુવા ફાટક નજીક કરવામાં આવેલી આ કાર્યવાહીમાં પોલીસે ડ્રગ્સ, એક્ટિવા અને મોબાઈલ ફોન સહિત કુલ ₹2.88 લાખનો મુદ્દામાલ જપ્ત કર્યો છે. પોલીસે આરોપીની ધરપકડ કરી આ ડ્રગ્સ ક્યાંથી લાવવામાં આવ્યું હતું અને તેની હેરફેરમાં અન્ય કોઈની સંડોવણી છે કે કેમ તે દિશામાં વધુ તપાસ હાથ ધરી છે.
ત્રણકુવા ફાટક નજીકથી સોન તલાવડી વિસ્તારમાં રહેતા 23 વર્ષીય ધ્રુવ નરેશભાઈ ગોહિલને ઝડપી પાડવામાં આવ્યો હતો. તપાસ દરમિયાન તેની પાસેથી MD ડ્રગ્સનો જથ્થો મળી આવતાં પોલીસે સમગ્ર મુદ્દામાલ કબજે કર્યો હતો.પોલીસે આરોપી પાસેથી 76 ગ્રામ MD ડ્રગ્સ કબજે કર્યું હતું, જેની કિંમત ₹2,28,000 આંકવામાં આવી છે. આ ઉપરાંત ₹50,000ની કિંમતનું એક્ટિવા અને ₹10,000ની કિંમતનો મોબાઈલ ફોન પણ જપ્ત કરવામાં આવ્યો છે. આમ, પોલીસે કુલ ₹2,88,000નો મુદ્દામાલ કબજે કર્યો છે.
ભરૂચ શહેરમાં યુવાનોને નશાના દૂષણથી બચાવવા અને માદક પદાર્થોના ગેરકાયદે વેપાર પર અંકુશ લાવવાના હેતુથી પોલીસ દ્વારા કાર્યવાહી કરવામાં આવી રહી છે. આ કેસમાં ઝડપાયેલા યુવક પાસેથી મળી આવેલા ડ્રગ્સનો જથ્થો ક્યાંથી લાવવામાં આવ્યો હતો, તે કોને પહોંચાડવાનો હતો અને આ ગેરકાયદે કારોબારમાં અન્ય કોઈ વ્યક્તિ સંડોવાયેલી છે કે કેમ તે અંગે પોલીસ તપાસ કરી રહી છે. તપાસ પૂર્ણ થયા બાદ આ મામલે વધુ વિગતો સામે આવી શકે છે.
