ભરૂચ જિલ્લા પોલીસ વિભાગ દ્વારા પણ પોલીસ હેડક્વાટર ગ્રાઉન્ડ પર ગરબા મહોત્સવનું આયોજન કરવામાં આવ્યું છે. જેમાં જગત જનની માં જગદંબાની આરાધનાના પર્વ નવરાત્રી મહોત્સવની ઉજવણી કરવામાં આવી રહી છે. ગરબા મહોત્સવમાં યુવાધન મનમુકીને ગરબે ઘૂમી રહ્યું છે.
ભરૂચ જિલ્લા પોલીસ અધિક્ષક ડો. લીના પાટીલ અને જિલ્લા કલેક્ટર તુષાર સુમેરા પોલીસ હેડ ક્વાર્ટર ખાતે આયોજિક ગરબા મહોત્સવમાં જોડાયા હતા. ત્રીજા દિવસે પોલીસ હેડ ક્વાર્ટરમાં ગરબા મહોત્સવમાં મોટી સંખ્યામાં લોકોએ ગરબે ઘૂમી માં જગદંબાની આરાધના કરી હતી. ગરબા મહોત્સવના ત્રીજા દિવસે પોલીસ વડા ડો. લીના પાટીલ , DYSP હેડ ક્વાર્ટર જે એસ નાયક અને ક્રાઇમ બ્રાન્ચના પોલીસ ઇન્સ્પેકટર ઉત્સવ બારોટ સહીત પોલીસ અધિકારીઓ ગરબા ગ્રાઉન્ડ ઉપર નજરે પડ્યા હતા.
કોરોનાની વૈશ્વિક મહામારીના કારણે છેલ્લા 2 વર્ષથી જાણે ઠપ્પ થઇ ગયેલા જનજીવનમાં ફરી એકવાર ગતિ આવી છે. ગણેશ મહોત્સવની રંગેચંગે ઉજવણી કર્યા બાદ લોકો હવે નવલા નોરતા માટે ગુજ્જુઓ સજ્જ બન્યા છે. નવરાત્રીમાં રાતે દીકરીઓ ગરબા મહોત્સવમાં જતી હોવાથી વાલીઓને તેમની દીકરીઓની પણ ચિંતા સતાવે છે. દીકરીઓ અને યુવતીઓ સલામતી અને સુરક્ષા સાથે ગરબા રમી શકે તે માટે ભરૂચ જિલ્લા પોલીસ દ્વારા ગરબા મહોત્સવનું આયોજન કરવામાં આવ્યું છે.
દીકરીઓની સલામતીના સંકલ્પ સાથે ભરૂચ જિલ્લા પોલીસ વડા કચેરી સ્થિત પોલીસ હેડક્વાટરના વિશાળ મેદાનમાં ગરબાનું આયોજન કરવામાં આવ્યું છે. જિલ્લા પોલીસ વડા ડો. લીના પાટીલે જણાવ્યું હતું કે સલામતી અને સુરક્ષાને ધ્યાનમાં રાખી આ નવતર આયોજન કરવામાં આવ્યું છે.
