આજ રોજ ગુજરાત ઉર્જા હિત રક્ષક સમિતિના નેજા હેઠળ ભરૂચ પાંચબત્તી ડીવિઝન કચેરી ખાતે કર્મચારીઓએ કાળી પટ્ટી ધારણ કરી વિવિધ સૂત્રોચ્ચાર સાથે માંગણીઓ કરી હતી.
જેમાં ભરૂચ ડી.જી.વી.સી.એલ.ના ટેકનિકલ કર્મચારીઓ દ્વારા સૂત્રોચ્ચાર કરી લેખીતમા માંગણી કરી હતી કે શૈક્ષણિક લાયકાતને ધ્યાનમાં રાખીને ગુજરાત સરકારના કર્મચારીઓ અને એકમોમાં વર્ગ ત્રણ મુજબ ભરતી કરવામાં આવે છે. તે મુજબ વર્ગ ત્રણ માં કર્મચારીઓનો સમાવેશ કરી તેમના ધારા ધોરણ મુજબના લાભો આપવામાં આવે,સાતમા પગાર પંચ મુજબ ટેકનીકલ કર્મચારીઓને ચૂકવવામાં આવતા ભથ્થાઓમાં જે વિસંગતતાઓ છે તેને દૂર કરવામાં આવે તેમજ જીવના જોખમે અદ્રશ્ય વીજ પ્રવાહ સાથે કામગીરી કરતા હોય જેના માટે રિસ્ક એલાઉન્સનો લાભ આપવામાં આવે.
સાથે કેન્દ્ર સરકારની ભલામણ મુજબ સાતમા પગાર પંચનો લાભ આપવામાં આવે,બીજો અને ચોથા શનિવારની રજાનો લાભ આપવામાં આવે,તેમજ આઠ કલાકથી વધુ કામગીરી કરવામાં આવે ત્યારે ઓવર ટાઈમનો લાભ આપવામાં આવે,અને નિવૃત્તિ બાદ મેડિકલ સુવિધાઓનો લાભ મળે જેવી વિવિધ માંગણીઓનું નિરાકરણ તાત્કાલિક લાવવા માટે રજૂઆત કરવામાં આવી હતી.સાથે જો માંગણીઓ સ્વીકારવામાં નહીં આવે તો ના છૂટકે ઉગ્ર આંદોલનના કાર્યક્રમો આપવાની ચીમકી પણ તેમણે ઉચ્ચારી હતી.