ભરૂચ જિલ્લાના વાગરા તાલુકાના સામંતપોર ખાતે આવેલી ATC ટાયર કંપની સાથે હાલોલની ઇનોવેટિવ ટાયર એન્ડ ટ્યુબ્સના 4 ડીરેક્ટરોએ ₹1.60 કરોડની છેતરપિંડી કરી હોવાની ફરિયાદ દહેજ પોલીસ મથકે દર્જ કરાવવામાં આવી છે.
વાગરાના સામંતપોર ખાતે આવેલી ATC કંપનીએ હાલોલ GIDCમાં આવેલી ઇનોવેટિવ ટાયર અને ટ્યુબ્સ કંપનીને ભરૂચની ATC દ્વારા જુલાઈ 2021 થી ટાયર કમ્પાઉન્ડ બનવવા કાચો માલ આપવાનું શરૂ કર્યું હતું. ડિસેમ્બર 2021 સુધી ATC એ હાલોલની કંપનીને કુલ 1565 મેટ્રીક ટન કાચો માલ આપ્યો હતો. જેમાંથી 1347 મેટ્રિક ટન ટાયર કમ્પાઉન્ડ બનાવી આપ્યું હતું.
જે બાદ હાલોલનું ઉત્પાદન કંપનીએ બંધ કરી દેતા 218 મેટ્રીક ટન ભરૂચની કંપનીને રો-મટિરિયલ્સ પરત કરાયું ન હતું. વારંવારની જાણ કરવા છતાં 121 મેટ્રીક ટન માલ પરત આપી વિશ્વાસ અને વાયદાઓ વચ્ચે આજદિન સુધી 92 મેટ્રીક ટન કિંમત રૂપિયા 1.60 કરોડનો કાચો માલ પચાવી પાડ્યો હતો. જે અંગે ATC કંપનીના ફાયનાન્સ આસી. જનરલ મેનેજર આશુતોષ સોમાનીએ દહેજ પોલીસ મથકે હાલોલની કંપનીના 4 ડિરેક્ટરો વડોદરા રહેતા મુકેશ ગુણવત દેસાઈ, અરવિંદ રામકિશોર તાંબી અને હાલોલના કેયુર મધુસુદન બક્ષી તેમજ કલ્પનાબેન પ્રકાશ જોશીપુરા સામે છેતરપિંડીની ફરિયાદ નોંધાવી છે.